തിരുവനന്തപുരം: പതിനഞ്ചാം കേരള നിയമസഭയുടെ ആദ്യ സമ്മേളനത്തില്‍ പ്രോടെം സ്പീക്കര്‍ പി.ടി.എ റഹീമിനു മുന്നില്‍ സത്യപ്രതിജ്ഞ ചെയ്ത എം.എല്‍.എമാരില്‍ പ്രായത്തില്‍ സീനിയര്‍ പി.ജെ ജോസഫ്. 79 വയസാണ് ജോസഫിന്. ഏറ്റവും ജൂനിയര്‍ 27കാരന്‍ കെ.എം സച്ചിന്‍ദേവാണ്.
ഇത്തവണ നിയമസഭയില്‍ 12 അംഗങ്ങള്‍ 40 വയസിനു താഴെയുള്ളവരാണ്. 30 പേരാണ് 40നും 50നുമിടയില്‍ പ്രായമുള്ളവര്‍. 48 അംഗങ്ങള്‍ 50നും 60നുമിടയില്‍ പ്രായമുള്ളവരാണ്. 28 അംഗങ്ങള്‍ 60നും 70നുമിടയില്‍. 70 കഴിഞ്ഞ 22 അംഗങ്ങളും സഭയിലുണ്ട്.

കഴിഞ്ഞതവണ വിജയന്‍പിള്ളയ്ക്ക് മുന്‍നിരയില്‍ സ്ഥാനം കിട്ടിയെങ്കില്‍ ഇത്തവണ മകന്‍ ഡോ. സുജിത് വിജയന്‍പിള്ളയ്ക്ക് ഇരിപ്പിടം ഏറ്റവും പിന്‍നിരയില്‍.
ചവറയില്‍നിന്ന് വിജയന്‍പിള്ള സി.എം.പി ടിക്കറ്റിലാണ് സഭയിലെത്തിയത്. അതിനാല്‍ കക്ഷിനേതാവ് എന്ന നിലയിലായിരുന്നു മുന്‍നിരയില്‍ ഇടം കിട്ടിയത്. മകന്‍ സി.പി.എം സ്വതന്ത്രനായി ജയിച്ചു സഭയിലെത്തിയതിനാലാണ് പിന്‍സീറ്റിലേക്ക് മാറ്റപ്പെട്ടത്.