കൊയിലാണ്ടി: നഗരത്തിലും ബസ് സ്റ്റാന്‍ഡിനു സമീപം റെയില്‍വേ മേല്‍പ്പാലത്തിനടിയിലും മാലിന്യം കുന്നുകൂടുന്നതു യാത്രക്കാര്‍ക്കും സമീപത്തെ കച്ചവടക്കാര്‍ക്കും വിനയാകുന്നു. പ്ലാസ്റ്റിക് ഉള്‍പ്പെടെയുള്ള നഗരമാലിന്യമാണു കൂമ്പാരമായി പരിസര മലിനീകരണത്തിനിടയാക്കുന്നത്.
പ്ലാസ്റ്റിക് കവറുകളിലെ ജീര്‍ണിച്ച ഭക്ഷണ സാധനങ്ങള്‍ പക്ഷികളും പട്ടികളും മറ്റും വലിച്ചിഴക്കുന്നതു കാരണം യാത്രക്കാര്‍ ഏറെ പ്രയാസമനുഭവിക്കുന്നു. മലമ്പനി ഉള്‍പ്പെടെയുള്ള പകര്‍ച്ചവ്യാധികള്‍ കൊയിലാണ്ടി മേഖലയില്‍ റിപ്പോര്‍ട്ട് ചെയ്യപ്പെട്ടിട്ടും അധികൃതര്‍ മാലിന്യ നിര്‍മാര്‍ജന കാര്യത്തില്‍ നടപടി സ്വീകരിക്കുന്നില്ലെന്ന ആക്ഷേപമുണ്ട്.