ഇരിട്ടി (കണ്ണൂർ)
രണ്ട് കോടിയിലേറെ വിലവരുന്ന തിമിംഗല ഛർദ്ദിലുമായി യുവാവ് അറസ്റ്റിൽ. തില്ലങ്കേരി ജിഗിൽ നിവാസിൽ ദിൻരാജ് (43) ആണ് പിടിയിലായത്. തില്ലങ്കേരിയിൽ പൊലിസ് സംഘത്തിൻ്റെ വാഹന പരിശോധനയ്ക്കിടെയാണ് ആൾട്ടോ കാറിൽ കടത്തുകയായിരുന്ന രണ്ടര കിലോയോളം വരുന്ന തിമിംഗല ഛർദ്ദിലുമായി ഇയാൾ പിടിയിലായത്. വിപണിയിൽ ഇതിന് രണ്ട് കോടിയോളം രൂപ വില വരുമെന്ന് പൊലിസ് അറിയിച്ചു. വാഹന പരിശോധനയ്ക്കിടെ കാറിൽനിന്ന് ഓടിരക്ഷപ്പെടാൻ ശ്രമിച്ച ദിൻരാജിനെ പൊലിസ് സംഘം പിടികൂടുകയായിരുന്നു. കാറിൽ ദിൻരാജിനൊപ്പമുണ്ടായിരുന്ന അഷ്‌റഫ് എന്നയാളും മറ്റൊരു സുഹൃത്തും ഇതിനിടെ കാറുമായി രക്ഷപ്പെട്ടു. ഇവർക്കായി അന്വേഷണം തുടങ്ങിയിട്ടുണ്ട്. സരീഷ് എന്നയാൾക്ക് നൽകാനാണ് തിമിംഗല ഛർദ്ദിൽ കൊണ്ടുവന്നതെന്ന് ചോദ്യം ചെയ്യലിൽ ദിൻരാജ് പറഞ്ഞു. തുടരന്വേഷണത്തിനായി പ്രതിയേയും തൊണ്ടിമുതലും വനംവകുപ്പിന് കൈമാറി. ഇന്നലെ ഉച്ചയ്ക്ക് രണ്ടോടെ മുഴക്കുന്ന് പ്രിൻസിപ്പൽ എസ്.ഐ എൻ.സി രാഘവൻ, എസ്.ഐ എം.ജെ സെബാസ്റ്റ്യൻ, എ.എസ്.ഐ ജയരാജൻ, സിവിൽ പൊലിസ് ഓഫിസർ കെ. സന്തോഷ് എന്നിവരുടെ നേതൃത്വത്തിലുള്ള സംഘം വാഹന പരിശോധന നടത്തവെയാണ് തിമിംഗല ഛർദ്ദിലുമായി പ്രതി അറസ്റ്റിലായത്.