വാഷിങ്ടൺ
അൽജസീറയുടെ ഫലസ്തീനി മാധ്യമപ്രവർത്തക ഷിറീൻ അബൂ ആഖിലയുടെ കൊലപാതകത്തിലെ വസ്തുതകൾ പരിശോധിക്കുമെന്ന് യു.എസ് വിദേശകാര്യ സെക്രട്ടറി ആന്റണി ബ്ലിങ്കൻ പറഞ്ഞു.
ലോസാഞ്ചൽസിൽ മാധ്യമവിദ്യാർഥികളുമായി സംവദിക്കവെ എന്തുകൊണ്ട് അതിക്രമങ്ങളുടെ പേരിൽ ഇസ്‌റാഈൽ യാതൊരു നടപടിയും നേരിടാത്തതെന്ന ചോദ്യത്തോട് പ്രതികരിക്കുകയായിരുന്നു ബ്ലിങ്കൻ. സ്വതന്ത്രവും വിശ്വസനീയവുമായ അന്വേഷണത്തിനായുള്ള ശ്രമത്തിലാണ് ഞങ്ങൾ. അത്തരമൊരു അന്വേഷണത്തിന്റെ ഫലം വരുന്നതോടെ, അത് എന്തുതന്നെയായാലും അതിലെ വസ്തുതകൾ ഞങ്ങൾ തീർച്ചയായും പിന്തുടരുമെന്നും ബ്ലിങ്കൻ കൂട്ടിച്ചേർത്തു.

അധിനിവിഷ്ട വെസ്റ്റ് ബാങ്കിലെ ജെനിൻ അഭയാർഥി ക്യാംപിൽ ഇസ്‌റാഈൽ അതിക്രമങ്ങൾ റിപ്പോർട്ട്‌ ചെയ്യുന്നതിനിടെ മെയ് 11നാണ് യു.എസ് വംശജയായ ഷിറീനെ ഇസ്‌റാഈൽ സൈന്യം കൊലപ്പെടുത്തിയത്.