നയ്പിദൊ: മ്യാന്‍മറിലെ പുതിയ ഭരണകൂടത്തിന് എല്ലാസഹായവും വാഗ്ദാനം ചെയ്ത് ഇന്ത്യ. മ്യാന്‍മര്‍ സന്ദര്‍ശിക്കുന്ന വിദേശകാര്യമന്ത്രി സുഷമാസ്വരാജും വിമോചനനേതാവ് ആങ്‌സാന്‍ സൂകിയും തമ്മില്‍ നടത്തിയ ചര്‍ച്ചയിലാണ് ഇന്ത്യ സഹായം വാഗ്ദാനം ചെയ്തത്. കഴിഞ്ഞ മാര്‍ച്ചില്‍ മ്യാന്‍മറില്‍ പുതിയ സര്‍ക്കാര്‍ ചുമതലയേറ്റ ശേഷം ഇതാദ്യമായാണ് ഇന്ത്യന്‍ വിദേശകാര്യമന്ത്രി മ്യാന്‍മറിലെത്തുന്നത്. ഏറെക്കാലത്തെ സൈനികഭരണത്തിനു ശേഷമാണ് മ്യാന്‍മറില്‍ ജനാധിപത്യം പുനഃസ്ഥാപിക്കപ്പെട്ടത്.

മ്യാന്‍മറിലെ ആദ്യ ജനാധിപത്യ തെരഞ്ഞെടുപ്പില്‍ വിജയിച്ച സൂകിയെ സുഷമ സ്വരാജ് അഭിനന്ദിച്ചു. മ്യാന്‍മറിന്റെ ദേശീയ ഉപദേഷ്ടാവും വിദേശകാര്യമന്ത്രിയുമാണ് സൂകി.

മ്യാന്‍മറിലെ സാമൂഹിക- സാമ്പത്തിക രംഗത്തും ജനാധിപത്യ പ്രക്രിയയിലും ഇന്ത്യയുടെ പിന്തുണയും സഹായവും ഉണ്ടാകുമെന്ന് സുഷമ പറഞ്ഞു. സൂകിയുടെ നാഷനല്‍ ലീഗ് ഫോര്‍ ഡെമോക്രസി കഴിഞ്ഞ വര്‍ഷം നടന്ന തെരഞ്ഞെടുപ്പില്‍ അട്ടിമറി വിജയം നേടിയിരുന്നു.