സ്വന്തം ലേഖകന്‍
പാലക്കാട്: തൃശൂര്‍ ജില്ലില്‍നിന്ന് മുറിച്ചു കടത്തിയ ഒരു കോടിയിലധികം രൂപയുടെ മരങ്ങള്‍ പാലക്കാട്ടെ വിവിധ മില്ലുകളില്‍നിന്ന് കണ്ടെത്തി.
മരംകൊള്ള അന്വേഷിക്കുന്ന വനം വകുപ്പ് ഫ്‌ളയിങ് സ്‌ക്വാഡിന്റെ പരിശോധനയിലാണ് തൃത്താല, വടക്കാഞ്ചേരി എന്നിവിടങ്ങളിലെ മില്ലുകളില്‍നിന്ന് മരങ്ങള്‍ കണ്ടെത്തിയത്.
പട്ടിക്കാട്, വടക്കാഞ്ചേരി റെയ്ഞ്ചുകളില്‍നിന്ന് മോഷണം പോയ തേക്കും വീട്ടിയുമടക്കമുള്ള മരങ്ങളാണ് കണ്ടെത്തിയത്. ഫര്‍ണിച്ചര്‍ നിര്‍മാണത്തിനായി മുറിച്ച് ഗോഡൗണുകളില്‍ സൂക്ഷിച്ചിരുന്ന മരങ്ങളും പിടികൂടിയിട്ടുണ്ട്. എണ്‍പതിലധികം ഉദ്യോഗസ്ഥരുടെ നേതൃത്വത്തില്‍ 52 ഇടങ്ങളിലാണ് പരിശോധന നടത്തിയത്. തൃശൂരില്‍നിന്ന് മുറിച്ച മരങ്ങള്‍ നേരത്തെ മലപ്പുറത്തും കണ്ടെത്തിയിരുന്നു.
വനം വകുപ്പ് ഓഫിസുകളില്‍ 2020 മാര്‍ച്ച് മുതല്‍ ഇതുവരെ മരംമുറിക്കലുമായി ബന്ധപ്പെട്ട രേഖകള്‍ അന്വേഷണോദ്യോഗസ്ഥര്‍ പരിശോധിക്കുന്നുണ്ട്. മരം മുറിക്കാന്‍ നല്‍കിയ അനുമതിപത്രങ്ങള്‍, മരം കൊണ്ടുപോകാനുള്ള പാസ് എന്നിവയും പരിശോധിക്കുന്നു. ഇതിനുപിന്നാലെയാണ് മില്ലുകള്‍ കേന്ദ്രീകരിച്ച് ഫ്‌ളയിങ് സ്‌ക്വാഡ് പരിശോധന.