വാടാനപ്പള്ളി: തളിക്കുളം ബ്ലോക്ക് പഞ്ചായത്തിന്റെ കീഴില്‍ അഞ്ച് ഗ്രാമപഞ്ചായത്തുകളില്‍ വീടില്ലാത്ത 200 പേര്‍ക്ക് വീട് വച്ചു നല്‍കുന്നതിന് നാലുകോടി രൂപയുടെ പദ്ധതിക്ക് ബ്ലോക്ക് പഞ്ചായത്ത് വികസന സെമിനാര്‍ രൂപം നല്‍കി. ജനറല്‍, പട്ടികജാതി വിഭാഗങ്ങള്‍ക്കായി നൂറ് വീട് വീതമാണ് നല്‍കുന്നത്. വലപ്പാട്, നാട്ടിക, തളിക്കുളം, വാടാനപ്പള്ളി, ഏങ്ങണ്ടിയൂര്‍ ഗ്രാമപഞ്ചായത്തുകളിലാണ് ഈ ഇരുന്നൂറ് വീടുകള്‍ നല്‍കുന്നത്.
മാലിന്യ സംസ്‌കരണം, ഉല്‍പാദനമേഖല, വൃദ്ധസംരക്ഷണം, വനിത വികസനം എന്നിവക്കും മുന്‍ഗണന നല്‍കും. ബ്ലോക്ക് പഞ്ചായത്ത് ഹാളില്‍ സംഘടിപ്പിച്ച സെമിനാര്‍ ഗീതാ ഗോപി എം.എല്‍.എ ഉദ്ഘാടനം ചെയ്തു.
ബ്ലോക്ക് പഞ്ചായത്ത് പ്രസിഡന്റ് എം.ആര്‍ സുഭാഷിണി അധ്യക്ഷയായിരുന്നു. ഗ്രാമപഞ്ചായത്ത് പ്രസിഡന്റുമാരായ ഇ.കെ തോമസ് (വലപ്പാട്), പി.വിനു (നാട്ടിക), കെ.കെ രജനി (തളിക്കുളം), ഷിജിത്ത് വടക്കുംഞ്ചേരി (വാടാനപ്പള്ളി), കെ.വി അശോകന്‍ (ഏങ്ങണ്ടിയൂര്‍) എന്നിവര്‍ പ്രസംഗിച്ചു. ബ്ലോക്ക് പഞ്ചായത്ത് വൈസ് പ്രസിഡന്റ് ഇ.പി ശശികുമാര്‍ സ്വാഗതവും, സെക്രട്ടറി ശ്രീജിത്ത് നന്ദിയും പറഞ്ഞു.