ഡല്‍ഹി: ഷാര്‍ജയില്‍ നിന്ന് ഹൈദരാബാദിലേക്ക് പറന്ന ഇന്‍ഡിഗോ വിമാനം സാങ്കേതിക തകരാര്‍ കാരണം പാകിസ്താനിലെ കറാച്ചിയില്‍ ഇറക്കി. മുന്‍കരുതല്‍ എന്ന നിലയിലാണ് അടിയന്തരമായി വിമാനം ഇറക്കിയതെന്നും യാത്രക്കാരെല്ലാം സുരക്ഷിതരാണെന്നും വിമാന കമ്പനി അധികൃതര്‍ അറിയിച്ചു. യാത്രക്കാരെ ഹൈദരാബാദിലെത്തിക്കാന്‍ മറ്റൊരു വിമാനം അയച്ചെന്നും ഇന്‍ഡിഗോ അറിയിച്ചു.

'ഷാര്‍ജയില്‍ നിന്ന് ഹൈദരാബാദിലേക്ക് സര്‍വീസ് നടത്തുന്ന ഇന്‍ഡിഗോ വിമാനം 6ഇ-1406 കറാച്ചിയിലേക്ക് തിരിച്ചുവിട്ടു. പൈലറ്റ് സാങ്കേതിക തകരാര്‍ കണ്ടെത്തിയതിനെ തുടര്‍ന്നാണ് നടപടി. മുന്‍കരുതല്‍ എന്ന നിലയിലാണ് വിമാനം തിരിച്ചുവിട്ടത്. യാത്രക്കാരെ ഹൈദരാബാദിലേക്ക് കൊണ്ടുവരാന്‍ മറ്റൊരു വിമാനം കറാച്ചിയിലേക്ക് അയക്കും'- ഇന്‍ഡിഗോ പ്രസ്താവനയില്‍ അറിയിച്ചു.

ഈ മാസം ഇതിനു മുന്‍പും ഇന്ത്യയില്‍ നിന്നുള്ള വിമാനം പാകിസ്താനിലേക്ക് തിരിച്ചുവിട്ടിട്ടുണ്ട്. ഡല്‍ഹിയില്‍ നിന്ന് ദുബൈയിലേക്കുള്ള സ്പൈസ് ജെറ്റ് വിമാനം ഇന്‍ഡിക്കേറ്റര്‍ ലൈറ്റിന്റെ തകരാര്‍ കാരണമാണ് പാകിസ്താനിലിറക്കിയത്. അതിലെ 138 യാത്രക്കാരെ ഇന്ത്യയില്‍ നിന്ന് അയച്ച മറ്റൊരു വിമാനത്തില്‍ ദുബൈയിലെത്തിച്ചു.