പൊന്നാനി: പ്രേമിച്ചു ശല്യം ചെയ്യുന്നതായി സഹപാഠിയായ ആണ്‍കുട്ടി അധ്യാപകര്‍ക്കു പരാതി നല്‍കിയതില്‍ മനംനൊന്തു വീടുവിട്ട വിദ്യാര്‍ഥിനിയെ കണ്ടെത്തി. ഹയര്‍സെക്കന്‍ഡറി വിദ്യാര്‍ഥിയായ പെണ്‍കുട്ടിയെ വീടുവിട്ട് അഞ്ചു ദിവസത്തിനു ശേഷം എറണാകുളത്തെ മഹിളാ മന്ദിരത്തിലാണ് കണ്ടെത്തിയത്.
അണ്ണക്കമ്പാടിനു സമീപം താമസിക്കുന്ന പെണ്‍കുട്ടി സഹപാഠിയോടു പ്രണയാഭ്യര്‍ഥന നടത്തിയത് ആണ്‍കുട്ടി നിരസിക്കുകയും തുടര്‍ന്നു പ്രിന്‍സിപ്പല്‍ക്കു പരാതി നല്‍കുകയുമായിരുന്നു. ഇതോടെ സ്‌കൂളധികൃതര്‍ പെണ്‍കുട്ടിയുടെ വീട്ടുകാരെ വിളിച്ചുവരുത്തി ഗുണദോഷിച്ചു. വീട്ടുകാരുടെ മുന്നില്‍ അപമാനിതയായതോടെയാണ് കുട്ടി വീടുവിട്ടത്. എറണാകുളത്തെ മഹിളാ മന്ദിരത്തെക്കുറിച്ചു പെണ്‍കുട്ടി നേരത്തേ വെബ്‌സൈറ്റിലൂടെ മനസിലാക്കിയിരുന്നു. പെണ്‍കുട്ടിയെ കാണാനില്ലെന്ന വാര്‍ത്ത ശ്രദ്ധയില്‍പെട്ടതോടെ മഹിളാ മന്ദിരം നടത്തിപ്പുകാര്‍ രക്ഷിതാക്കളെ വിളിച്ചുവരുത്തുകയായിരുന്നു. തുടര്‍ന്നു പെണ്‍കുട്ടിയെ രക്ഷിതാക്കള്‍ക്കൊപ്പം വിട്ടു.