കാത്തിരിപ്പുകള്‍ വിഫലം; അഞ്ച് വയസുകാരി ചാന്ദ്‌നിയുടെ മൃതദേഹം കണ്ടെത്തി

കൊച്ചി: ആലുവയില്‍ തട്ടിക്കൊണ്ട് പോയ അഞ്ച് വയസുകാരി ചാന്ദ്‌നിയുടെ മൃതദേഹം കണ്ടെത്തി. ഇന്ന് ഉച്ചയോടെ ആലുവ മാര്‍ക്കറ്റിന് സമീപം ചാക്കില്‍ കെട്ടിയ നിലയിലായിലാണ് കുട്ടിയുടെ മൃചദേഹം കണ്ടെത്തിയത്. കാലികളെ കെട്ടുന്ന ചന്തക്ക് സമീപത്തായി കിടന്നിരുന്ന ചാക്ക് കണ്ടതിനെ തുടര്‍ന്ന് ചുമട്ട് തൊഴിലാളികളാണ് പൊലിസില്‍ വിവരമറിയിച്ചത്. ക്രൂരമായ രീതിയിലാണ് കുട്ടിയെ കൊലപ്പെടുത്തിയതെന്ന് പൊലിസ് പറഞ്ഞു. ശരീര ഭാഗം ഒടിച്ച് ചാക്കില്‍ കെട്ടിയ നിലയിലായിരുന്നു മൃതദേഹം കിടന്നിരുന്നത്.

കുട്ടിയെ തട്ടിക്കൊണ്ട് പോയ അസം സ്വദേശി അസ്ഫാക്ക് ആലമിനെ പൊലിസ് നേരത്തെ കസ്റ്റഡിയിലെടുത്തിരുന്നു. എന്നാല്‍ ഇയാള്‍ തന്നെയാണോ കൊലപാതകം നടത്തിയതെന്ന കാര്യത്തില്‍ പൊലിസ് സംശയത്തിലാണ്. ഇയാള്‍ കുട്ടിയെ മറ്റൊരാള്‍ക്ക് കൈമാറിയിതായി നേരത്തെ സമ്മതിച്ചിരുന്നു. കുട്ടിയെ കൈമാറിയെന്ന് കരുതുന്ന സാക്കിര്‍ എന്ന വ്യക്തിയും പൊലിസ് കസ്റ്റഡിയിലുണ്ട്. കൊലപാതകം നടത്തിയത് ആരാണെന്ന കാര്യത്തിലാണ് ഇനി വ്യക്തത വരേണ്ടത്.

ഇന്നലെ ഉച്ചക്ക് മൂന്ന് മണിയോടെയാണ് ബീഹാര്‍ സ്വദേശികളായ മഞ്ജയ് കുമാറിന്റെയും നീതയുടെയും മകള്‍ അഞ്ച് വയസുകാരി ചാന്ദ്നിയെ അസ്ഫക് ആലം തട്ടിക്കൊണ്ട് പോയത്. ചൂര്‍ണിക്കരിയിലെ വാടക വീട്ടില്‍ നിന്നാണ് കുട്ടിയെ കാണാതായത്. സമീപത്തുള്ള കടയില്‍ നിന്ന് ജ്യൂസ് വാങ്ങി കൊടുത്താണ് പ്രതി കുട്ടിയെ കടത്തിയത്.