ലോകത്തിലെ താങ്ങാനാവുന്ന ചെലവുള്ള പത്ത് നഗരങ്ങളുടെ പട്ടികയിൽ യുഎഇയിൽ നിന്ന് മൂന്ന് നഗരങ്ങൾ, ഗൾഫിൽ നിന്ന് ആകെ അഞ്ച് നഗരങ്ങൾ

ദുബൈ: ലോകത്തിലെ ഏറ്റവും താങ്ങാനാവുന്ന ചെലവുകളുള്ള ഏറ്റവും മികച്ച പത്ത് കോസ്‌മോപൊളിറ്റൻ നഗരങ്ങളുടെ പട്ടികയിൽ മൂന്ന് സ്ഥാനങ്ങൾ നേടി യുഎഇ. തലസ്ഥാനമായ അബുദാബി, ദുബൈ, ഷാർജ എന്നീ നഗരങ്ങളാണ് പട്ടികയിൽ ഇടം പിടിച്ചത്. ഉയർന്ന വരുമാനവും കുറഞ്ഞ ജീവിതച്ചെലവുമുള്ള, ആഗോളതലത്തിൽ ഏറ്റവും താങ്ങാനാവുന്ന നഗരങ്ങളുടെ പട്ടികയാണ് പുറത്തുവിട്ടത്. പട്ടികയിൽ ഒന്നാം സ്ഥാനം കുവൈത്തിനാണ്,

വർക്ക്‌യാർഡ് റിസർച്ച് നടത്തിയ സർവേ പ്രകാരം പട്ടികയിൽ അബുദാബി രണ്ടാം സ്ഥാനത്താണ്. ദുബൈ നാലാം സ്ഥാനത്തും ഷാർജ അഞ്ചാം സ്ഥാനത്തുമാണ് നേട്ടമുണ്ടാക്കിയത്. താമസക്കാർക്ക് അവരുടെ അടിസ്ഥാന ചെലവുകൾ വഹിച്ചതിന് ശേഷം അവരുടെ ശമ്പളത്തിന്റെ ഭൂരിഭാഗവും കൈവശം വെക്കാൻ സാധിക്കുന്ന നഗരമെന്ന നിലയിലാണ് കുവൈത്ത് ഒന്നാം സ്ഥാനം സ്വന്തമാക്കിയത്. കുവൈത്തിൽ ഒരു താമസക്കാരന്റെ ശരാശരി പ്രതിമാസ വരുമാനം $6,199 ആണ്. എന്നാൽ ജീവിതച്ചെലവ് ആകട്ടെ $752.70 മാത്രമാണ്.

ന്യൂയോർക്ക് ആണ് പട്ടികയിൽ ഏറ്റവും താഴെയുള്ള നഗരം. ഉയർന്ന വരുമാനം ഉണ്ടെങ്കിലും ജീവിത ചെലവുകളിലെ ഉയർന്ന നിരക്കാണ് ന്യൂയോർക്കിനെ പട്ടികയിലെ അടിത്തട്ടിലെത്തിച്ചത്.

അബുദാബിയാണ് പട്ടികയിൽ രണ്ടാം സ്ഥാനത്ത്. ഇവിടെ താമസിക്കുന്നവർ ഓരോ മാസവും ഏകദേശം $7,154 വീട്ടിലേക്ക് കൊണ്ടുവരുന്നു, അവരുടെ ജീവിതച്ചെലവുകൾക്കായി ഏകദേശം $873.10 ചെലവഴിക്കുന്നു.

റിയാദ് ഏറ്റവും താങ്ങാനാവുന്ന മൂന്നാമത്തെ നഗരമാണ്. ഇവിടെ ശരാശരി പ്രതിമാസ വരുമാനം $6,245 ആണ്, കൂടാതെ ജീവിതച്ചെലവ് $814.90 ആണ്.

നാലാം സ്ഥാനത്തുള്ള ദുബൈയിലെ പ്രതിമാസ ശരാശരി വരുമാനം 7,118 ഡോളറും ചെലവ് $1,007 ഡോളറുമാണ്. അഞ്ചാമതുള്ള ഷാർജയിൽ വരുമാനം 5,229 ഡോളറും ചെലവ് 41.30 ഉം ആണ്.

ആളുകൾ ഏത് രാജ്യത്താണ് പണം സമ്പാദിക്കുന്നതെന്ന് നിർണ്ണയിക്കാൻ ഗവേഷണ സ്ഥാപനത്തിന്റെ വിദഗ്ധർ 20 നഗരങ്ങളിൽ നിന്നുള്ള ഡാറ്റ വിശകലനം ചെയ്തു. ഓരോ നഗരത്തിന്റെയും ശരാശരി പ്രതിമാസ വരുമാനവും 2023-ലെ ശരാശരി പ്രതിമാസ ജീവിതച്ചെലവും താരതമ്യം ചെയ്തു. സർക്കാർ തൊഴിൽ സ്രോതസ്സുകളിൽ നിന്നാണ് ഡാറ്റ സമാഹരിച്ചത്. ഉയർന്ന വരുമാനമുള്ളതും ചെലവുകുറഞ്ഞതുമായ ജീവിതശൈലി ആഗ്രഹിക്കുന്ന വ്യക്തികൾക്ക് മികച്ച അവസരങ്ങൾ നൽകുന്ന നഗരങ്ങളെയാണ് പട്ടിക അവതരിപ്പിക്കുന്നത്.

മിഡിൽ ഈസ്റ്റിന് പുറത്ത്, ഓസ്‌ട്രേലിയയിലെ മെൽബൺ സമ്പാദിക്കാനും ജീവിക്കാനുമുള്ള നല്ലൊരു സ്ഥലമാണെന്ന് റിപ്പോർട്ട് പറയുന്നു. ആറാം സ്ഥാനത്തുള്ള ഇവിടെ ശരാശരി പ്രതിമാസ വരുമാനം $7,312 ഉം ജീവിതച്ചെലവ് ഏകദേശം $1,079.20 ഉം ആണ്.

ഏഴാം സ്ഥാനത്തുള്ള നോർവേയിലെ ഓസ്ലോയും ഒട്ടും പിന്നിലല്ല. താമസക്കാർ പ്രതിമാസം 7,543 ഡോളർ സമ്പാദിക്കുകയും ജീവിതച്ചെലവുകൾക്കായി ഏകദേശം $1,121.50 ചെലവഴിക്കുകയും ചെയ്യുന്നു.

യഥാക്രമം $8,411, $9,249 എന്നിങ്ങനെ പ്രതിമാസ വരുമാനവുമായി ലണ്ടനും സാൻ ഫ്രാൻസിസ്കോയും പട്ടികയിൽ 8-ഉം 9-ഉം സ്ഥാനത്താണ്. ഈ നഗരങ്ങളിലെ ജീവിതച്ചെലവ് പ്രതിമാസം $1,260.80, $1,440.10 എന്നിങ്ങനെയാണ്.

സൂറിച്ച് ആദ്യ പത്തിൽ ഇടം നേടി. താമസക്കാർ പ്രതിമാസം ഏകദേശം $9,222 സമ്പാദിക്കുകയും ജീവിതച്ചെലവുകൾക്കായി ഏകദേശം $1,815.20 ചെലവഴിക്കുകയും ചെയ്യുന്നു.