ഭോപ്പാല്‍: കുട്ടികളുമായി പോയ സ്‌കൂള്‍ ബസ് അഴുക്കുചാലില്‍ കുടുങ്ങി. മധ്യപ്രദേശിലെ ഷാജാപൂര്‍ ജില്ലയിലാണ് സംഭവം. 24ഓളം വിദ്യാര്‍ത്ഥകളാണ് ബസിലുണ്ടായിരുന്നത്. ട്രാക്ടറും വലിയ കയറും ഉപയോഗിച്ച് ഗ്രാമവാസികള്‍ ചേര്‍ന്ന് ബസ് പുറത്തെടുത്തു.

അഴുക്കുചാലിലെ ജലനിരപ്പ് ഉയര്‍ന്നതിനെ തുടര്‍ന്നാണ് ബസ് കുടുങ്ങിയത്. ബസില്‍ സഹായം അഭ്യര്‍ത്ഥിക്കുന്ന കുട്ടികളുടെ വിഡിയോ പുറത്ത് വന്നിട്ടുണ്ട്. ബസിലെ കുട്ടികളെല്ലാം സുരക്ഷിതരാണെന്ന് പൊലിസ് അറിയിച്ചു. കഴിഞ്ഞ കുറേ ദിവസങ്ങളായി കനത്ത മഴയാണ് മധ്യപ്രദേശില്‍ അനുഭവപ്പെടുന്നത്.

മധ്യപ്രദേശിലെ പല ജില്ലകളിലും കേന്ദ്രകാലാവസ്ഥ വകുപ്പ് ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. കഴിഞ്ഞയാഴ്ച നാഗ്പൂരില്‍ പാലത്തിലൂടെ പോകുന്നതിനിടെ കാര്‍ ഒഴുകി പോയി മൂന്ന് പേര്‍ മരിച്ചിരുന്നു.