തൃശ്ശൂര്‍: തൃശ്ശൂര്‍ കോടാലിയില്‍ മകന്‍ അമ്മയെ ഗ്യാസ് കുറ്റി കൊണ്ട് തലക്ക് അടിച്ചു കൊലപ്പെടുത്തിയ സംഭവത്തില്‍ കൂടുതല്‍ വിവരങ്ങള്‍ പുറത്ത്. വീട് വിറ്റ് കിട്ടിയ പണം കൊടുക്കാത്തതിന്റെ വൈരാഗ്യമാണ് കൊലയ്ക്ക് കാരണമെന്നും പ്രതി വിഷ്ണു ചെറുപ്പം മുതലേ ലഹരിക്ക് അടിമയായിരുന്നുവെന്നും പൊലീസ് പറയുന്നു.

വെള്ളിയാഴ്ച്ച വൈകീട്ട് നാല് മണിയോടെയാണ് സംഭവം. കൊള്ളിക്കുന്നിലെ വാടകവീട്ടിലാണ് ഇവര്‍ താമസിച്ചിരുന്നത്. ഇവിടേക്ക് താമസം മാറിയതിന് ഒരു മാസം മുന്‍പ് അതുവരെ താലൂര്‍പാട് താമസിച്ചിരുന്ന വീട് വിറ്റുകിട്ടിയ പണമായ 5 ലക്ഷം രൂപ ശോഭന ബാങ്കിലിട്ടിരുന്നു. ഈ പണം എടുത്ത് നല്‍കാന്‍ വിഷ്ണു ആവശ്യപ്പെട്ടിട്ടും ശോഭന തയ്യാറായിരുന്നില്ല.

സംഭവം നടന്ന ദിവസം ശോഭനയും വിഷ്ണുവുമാണ് ഈ സമയത്ത് വീട്ടിലുണ്ടായിരുന്നത്. ശോഭനയുടെ ഭര്‍ത്താവ് ചാത്തുക്കുട്ടി പണിക്ക് പോയിരിക്കുകയായിരുന്നു. പണത്തെച്ചൊല്ലി തര്‍ക്കമുണ്ടാവുകയും വീടിന്റെ ഹാളില്‍ വച്ച് ഗ്യാസ് കൊണ്ട് അമ്മയെ മകന്‍ അടിച്ചുവീഴ്ത്തുകയുമായിരുന്നു.

കൊലയ്ക്ക് ശേഷം വിഷ്ണു പൊലീസ് സ്റ്റേഷനില്‍ എത്തിയിട്ടും ആദ്യം ഒന്നും പറയാന്‍ കൂട്ടാക്കിയിരുന്നില്ല. ഏറെ നേരം മിണ്ടാതെ നിന്ന വിഷ്ണുവിനോട് ഷര്‍ട്ടിലെ ചോരക്കറ എന്താണെന്ന് പൊലീസുകാര്‍ ആവര്‍ത്തിച്ച് ചോദിച്ചപ്പോഴാണ് കൊലപാതക വിവരം പറയുന്നത്.