ദുബൈ:തൊഴില്‍ മന്ത്രാലയത്തില്‍ പരാതി നല്‍കിയതിന്റെ പേരില്‍ ജീവനക്കാരെ പിരിച്ചുവിടരുതെന്ന് യു.എ.ഇ അധികൃതര്‍. തൊഴില്‍ കരാര്‍ അവസാനിപ്പിക്കുമ്പോള്‍ ഇരു വിഭാഗവും രേഖാമൂലം അറിയിക്കണമെന്നും നിലവിലുള്ള കരാര്‍ റദ്ദാക്കുകയാണെങ്കില്‍ തൊഴിലാളിയും തൊഴിലുടമയും പരസ്പരം രേഖാമൂലം അറിയിക്കണമെന്നും തൊഴില്‍ മന്ത്രാലയം ആവശ്യപ്പെട്ടു . തൊഴില്‍ കരാര്‍ റദ്ദാക്കുകയാണെങ്കില്‍ മൂന്നു മാസത്തിനുള്ളില്‍ രേഖാമൂലം പരസ്പരം അറിയിക്കണം. നോട്ടിസ് സമയത്ത് തൊഴില്‍ കരാര്‍ സാധുവായിരിക്കും. ഈ കാലയളവില്‍ ജീവനക്കാര്‍ക്ക് പൂര്‍ണ വേതനത്തിനു അവകാശമുണ്ടെന്നും തൊഴില്‍ മന്ത്രാലയം അറിയിച്ചു.തൊഴില്‍ ബന്ധം അവസാനിപ്പിക്കുമെന്ന് അറിയിച്ച ദിവസം മുതലുള്ള നിശ്ചിത കാലയളവ് നോട്ടിസ് പീരിയഡായി പരിഗണിക്കും. തൊഴിലാളിയും തൊഴിലുടമയും തമ്മില്‍ തര്‍ക്കമുണ്ടാവുകയും തൊഴിലുടമയ്‌ക്കെതിരേ മാനവ വിഭവശേഷി,സ്വദേശിവല്‍ക്കരണ മന്ത്രാലയത്തിലോ കോടതിയിലോ പരാതിപ്പെടുകയും ചെയ്താല്‍ ഇക്കാരണം കൊണ്ട് ജോലിയില്‍ നിന്നും പിരിച്ചുവിടാന്‍ പാടില്ല. എന്നാല്‍ 2021 ലെ ഫെഡറല്‍ തൊഴില്‍ നിയമം 42/33 പ്രകാരം താഴെ പറയുന്ന കാരണങ്ങളാല്‍ തൊഴില്‍ കരാര്‍ റദ്ദാക്കാന്‍ തൊഴിലുടമയ്ക്ക് അവകാശമുണ്ട്. *തൊഴില്‍ കരാര്‍ അവസാനിക്കുകയും പുതുക്കേണ്ടതില്ലെന്ന് ഇരു കൂട്ടരും തീരുമാനിക്കുകയും ചെയ്താല്‍ . *തൊഴില്‍ കരാറിലെ തൊഴിലുടമ മരണപ്പെടുന്ന സാഹചര്യത്തില്‍. * തൊഴിലാളി മരണപ്പെടുകയോ തൊഴിലെടുക്കാന്‍ കഴിയാത്ത വിധം ശാരീരിക ക്ഷമത നഷ്ടപ്പെടുകയോ ചെയ്താല്‍. (ഇതിനു മെഡിക്കല്‍ സര്‍ട്ടിഫിക്കറ്റ് വേണം) *തൊഴിലാളി ജയിലിലാവുകയോ നിയമ നടപടി നേരിടുകയോ ചെയ്താല്‍. * ജോലി ചെയ്യുന്ന സ്ഥാപനം പൂട്ടിപ്പോയാല്‍ (തൊഴിലുടമ പാപ്പരാകുന്ന സാഹചര്യത്തില്‍). *ലേബര്‍ കാര്‍ഡ് പുതുക്കാനുള്ള വ്യവസ്ഥകള്‍ തൊഴിലാളി പൂര്‍ത്തിയാക്കാതിരുന്നാല്‍.