തളിപ്പറമ്പ് (കണ്ണൂര്‍): സ്‌പൈനല്‍ മസ്‌കുലാര്‍ അട്രോഫി എന്ന അപൂര്‍വരോഗം ബാധിച്ച ഒന്നരവയസുകാരന്‍ മുഹമ്മദ് ഖാസിം ജീവിതത്തിലേക്ക് തിരിച്ചുവരാന്‍ സുമനസുകളുടെ സഹായം തേടുന്നു. സ്‌പൈനല്‍ മസ്‌കുലാര്‍ അട്രോഫി (എസ്.എം.എ) രോഗം ബാധിച്ച ഖാസിമിനു സാധാരണ ജീവിതത്തിലേക്കു മടങ്ങി വരണമെങ്കില്‍ രണ്ടുവയസിനകം 18 കോടി ചെലവുവരുന്ന സോള്‍ജെന്‍സ്മ ജീന്‍ തെറാപ്പി മരുന്ന് ലഭ്യമാക്കണം. മംഗളൂരുവിലെ സ്വകാര്യ ആശുപത്രിയില്‍ നടത്തിയ പരിശോധനയിലാണ് ഖാസിമിന് എസ്.എം.എ ടൈപ്പ് 2 ബാധിച്ചതായി കണ്ടെത്തിയത്. ആറുമാസം പ്രായമായപ്പോള്‍ തന്നെ ഇരിക്കാനും മുട്ടിട്ട് ഇഴയാനും തുടങ്ങിയ ഖാസിമിനു പിന്നീട് തളര്‍ച്ച കണ്ടാണു പരിശോധനകള്‍ തുടങ്ങിയത്. കാത്സ്യത്തിന്റെ കുറവാണെന്ന നിലയില്‍ ചികിത്സ തുടര്‍ന്നെങ്കിലും പുരോഗതി ഇല്ലാത്തതിനാലാണ് മംഗളൂരുവില്‍ വിദഗ്ധ പരിശോധന നടത്തിയതും രോഗം കണ്ടെത്തിയതും.
നിലവില്‍ ബംഗളൂരിലെ ആശുപത്രിയിലാണ് ചികിത്സ നടത്തിവരുന്നത്. ഇരിട്ടിയിലെ കെ.എ മുഹമ്മദിന്റെയും ചപ്പാരപ്പടവ് മഖാമിനു സമീപത്തെ പി.പി.എം ഫാത്തിമത്ത് ഷാഹിറയുടെയും മകനാണു ഖാസിം. നിര്‍ധനരായ ഖാസിമിന്റെ കുടുംബത്തിനു സോള്‍ജെന്‍സ്മ മരുന്നിന് ആവശ്യമായ 18 കോടി കണ്ടെത്തുക അസാധ്യമാണ്. മന്ത്രി എം.വി ഗോവിന്ദന്‍, കെ. സുധാകരന്‍ എം.പി എന്നിവര്‍ മുഖ്യരക്ഷാധികാരികളായി സഹായധനം സ്വരൂപിക്കാനായി ഫെഡറല്‍ ബാങ്ക് ഏര്യം ശാഖയില്‍ ജോയിന്റ് അക്കൗണ്ടും തുറന്നു. നന്മയുള്ളവര്‍ സഹായിച്ചാല്‍ ഈ കുഞ്ഞിനെ ജീവിതത്തിലേക്ക് തിരികെ കൊണ്ടുവരാന്‍ സാധിക്കുമെന്നും എല്ലാവരുടെയും സഹകരണം ഉണ്ടാകണമെന്നും ചികിത്സാ സഹായകമ്മിറ്റി ചെയര്‍പേഴ്‌സണ്‍ സുനിജാ ബാലകൃഷ്ണന്‍, ജനറല്‍കണ്‍വീനര്‍ അബ്ദുറഹ്മാന്‍ പെരുവണ, കണ്‍വീനര്‍മാരായ എം.എം അജ്മല്‍, എം. മൈമൂനത്ത് എന്നിവര്‍ വാര്‍ത്താ സമ്മേളനത്തില്‍ അഭ്യര്‍ഥിച്ചു. സഹായങ്ങള്‍ ഫെഡറല്‍ ബാങ്ക് ഏര്യം ബ്രാഞ്ചിലെ 13280200001942 എന്ന നമ്പര്‍ അക്കൗണ്ടില്‍ എത്തിക്കണം. ഐ.എഫ്.എസ്.സി: എഫ്.ഡി.ആര്‍.എല്‍ 0001328. ഫോണ്‍: 9496049045, 9496504555.