മുംബൈ: മുംബൈ അന്താരാഷ്ട്ര വിമാനത്താവളത്തില്‍ സ്ഥാപിച്ച അദാനി ഗ്രൂപ്പിന്റെ ബോര്‍ഡ് ശിവസേന പ്രവര്‍ത്തകര്‍ പൊളിച്ചുമാറ്റി. വിമാനത്താവളത്തിന്റെ നടത്തിപ്പ് ഏറ്റെടുത്തതിനു പിന്നാലെയാണ് വലിയ ബോര്‍ഡ് സ്ഥാപിച്ചത്. ഇതാണ് ശിവസേന പ്രവര്‍ത്തകരെത്തി തകര്‍ത്തത്. തുടര്‍ന്ന് പാര്‍ട്ടി കൊടി നാട്ടുകയും ചെയ്തു.

മുംബൈ വിമാനത്താവളത്തിന്റെ പേര് ഛത്രപതി ശിവജി മഹാരാജ് വിമാനത്താവളം എന്നാണെന്നും അത് മാറ്റാന്‍ അദാനി ഗ്രൂപ്പിന് അധികാരമില്ലെന്നും ശിവസേന പ്രവര്‍ത്തകര്‍ പറഞ്ഞു.

അതേസമയം വിഷയത്തില്‍ വിശദീകരണവുമായി അദാനി ഗ്രൂപ്പ് രംഗത്തെത്തി. എയര്‍പോര്‍ട്‌സ് അതോറിറ്റി ഓഫ് ഇന്ത്യയുടെ മാര്‍ഗ നിര്‍ദേശങ്ങള്‍ പാലിച്ചാണ് ബോര്‍ഡ് സ്ഥാപിച്ചതെന്നും ഛത്രപതി ശിവജി അന്താരാഷ്ട്ര വിമാനത്താവളം എന്ന പേര് മാറ്റാന്‍ ശ്രമിച്ചിട്ടില്ലെന്നും അദാനി എയര്‍പോര്‍ട്‌സ് ഹോള്‍ഡിങ് ലിമിറ്റഡ് (എഎഎച്ച്എല്‍) വക്താവ് പ്രതികരിച്ചു. വിമാന യാത്രികരുടെ സൗകര്യം മുന്‍നിര്‍ത്തി സര്‍ക്കാര്‍ നിര്‍ദേശങ്ങള്‍ പാലിച്ച് മാത്രമാവും തുടര്‍ന്ന് പ്രവര്‍ത്തിക്കുകയെന്നും അവര്‍ വ്യക്തമാക്കി.

അദാനി ഗ്രൂപ്പ് വിമാനത്താവളത്തിന്റെ നടത്തിപ്പ് ഏറ്റെടുത്തതിന് പിന്നാലെ പേര് മാറ്റി എന്ന പരാതി ലഭിച്ചത് കൊണ്ടാണ് ഈ ബോര്‍ഡ് നീക്കം ചെയ്തതെന്ന് ശിവസേന പ്രവര്‍ത്തകരുടെ ന്യായം.