നോൾ കാർഡും ടിക്കറ്റും ഇല്ലാതെ ഇനി ദുബൈയിൽ പൊതുഗതാഗതത്തിൽ യാത്ര ചെയ്യാം

ദുബൈ: ദുബൈയുടെ ഏറ്റവും വലിയ പ്രത്യേകതയാണ് ഒരു കാർഡ് ഉണ്ടെങ്കിൽ നിങ്ങൾക്ക് എമിറേറ്റിന്റെ ഏത് മൂലയിലേക്കും സഞ്ചരിക്കാം എന്നുള്ളത്. നോൾ കാർഡ് ഉപയോഗിച്ചാണ് ദുബൈയിൽ ആളുകൾ ഇതുവരെ പൊതുഗതാഗത യാത്ര സുഖകരമാക്കിയിരുന്നത്. എന്നാൽ വൈകാതെ ഈ നോൾ കാർഡ് ഇല്ലാതെ യാത്ര ചെയ്യാനുള്ള അവസരമൊരുങ്ങും.നോൾ കാർഡ് മാത്രമല്ല ടിക്കറ്റുകളോ ക്രെഡിറ്റ് കാർഡുകളോ ഒന്നും ഇല്ലാതെ നിങ്ങൾക്ക് ഉടൻ ദുബൈയിൽ പൊതുഗതാഗതം ഉപയോഗിക്കാനാകും. സ്മാർട്ട് ഗേറ്റ് വഴി നിങ്ങൾ കടന്ന് പോയാൽ മാത്രം മതിയാകും പൊതുഗതാഗതം ഉപയോഗിക്കാൻ. പണം അക്കൗണ്ടിൽ നിന്ന് പൊയ്ക്കോളും.

ദുബൈ മെട്രോ, ട്രാം, ബസുകൾ, ടാക്‌സികൾ, മറൈൻ ഗതാഗതം എന്നിവയ്‌ക്കുള്ള നിരക്കുകൾ നൽകുന്നതിന് യാത്രക്കാരെ അനുവദിക്കുന്ന സ്മാർട്ട് ഗേറ്റ്, റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ) അവതരിപ്പിച്ചു. ദുബൈ വേൾഡ് ട്രേഡ് സെന്ററിൽ ഇന്ന് ആരംഭിച്ച ലോകത്തിലെ ഏറ്റവും വലിയ സാങ്കേതിക, സ്റ്റാർട്ടപ്പ് എക്‌സിബിഷനായ Gitex Global-ൽ ആർടിഎ പ്രദർശിപ്പിക്കുന്ന നിരവധി സ്മാർട്ട് പ്രോജക്ടുകളിൽ ഒന്നാണിത്. വൈകാതെ തന്നെ ഇത് നടപ്പിലാകും.

മുഖം തിരിച്ചറിയൽ ഉപയോഗിച്ചാണ് സ്മാർട്ട് ഗേറ്റ് യാത്രക്കാർക്ക് തടസ്സമില്ലാത്ത യാത്ര അനുവദിക്കുക. ഇതിനായി ഉപയോക്താക്കൾ ആദ്യം രജിസ്റ്റർ ചെയ്യേണ്ടതുണ്ട്. ശേഷം, ഒരു 3ഡി ക്യാമറ ഉപയോഗിച്ച് അവരുടെ മുഖം വിശകലനം ചെയ്ത് സിസ്റ്റം അവരെ തിരിച്ചറിയും. തുടർന്ന് ബയോ-ഡാറ്റ പരിശോധിച്ചുറപ്പിക്കുകയും നിരക്ക് അവരുടെ അക്കൗണ്ടിൽ നിന്ന് കുറയ്ക്കുകയും ചെയ്യും.