കൊല്ലം: കരുനാഗപ്പളളി തഴവയില്‍ ലോറിതട്ടി പൊട്ടിവീണ കേബിള്‍ കുരുങ്ങി റോഡരുകിലെ സ്‌കൂട്ടറിലിരുന്ന വീട്ടമ്മയ്ക്ക് ഗുരുതരപരുക്ക്. വളാലില്‍ മുക്കില്‍ സന്ധ്യക്കാണ് പരുക്കേറ്റത്. തടി ലോഡുമായി വന്ന ലോറി തട്ടി കേബിള്‍ പൊട്ടി വീഴുകയായിരുന്നു. ലോറി നിര്‍ത്താതെ പോയതോടെ കേബിള്‍ സ്‌കൂട്ടറിലും യുവതിയുടെ കാലിലുമായി കുരുങ്ങുകയായിരുന്നു. 

ലോറി മുന്നോട്ടു നീങ്ങിയതോടെ കുരുങ്ങിയ കേബിള്‍ യുവതിയെ മുന്നോട്ടു വലിച്ചിഴക്കുകയും മുകളിലേക്ക് ഉയര്‍ന്നുപൊങ്ങിയ സ്‌കൂട്ടര്‍ യുവതിയുടെ മുകളില്‍ പതിക്കുകയുമായിരുന്നു. 

ശനിയാഴ്ച്ച ഉച്ചയോടെയായിരുന്നു സംഭവം. കൊച്ചുകുറ്റിപ്പാലത്ത് ഭര്‍ത്താവ് തുളസീധരന്‍ നടത്തുന്ന വര്‍ക്‌ഷോപ്പിനു മുകളില്‍ സ്‌കൂട്ടറില്‍ ഇരിക്കുകയായിരുന്നു സന്ധ്യ. 20 മീറ്ററോളം യുവതി കേബിളില്‍ കുരുങ്ങി മുന്നോട്ട് നീങ്ങി. നാട്ടുകാര്‍ ബഹളം വച്ചതിനെ തുടര്‍ന്നാണ് ലോറി നിര്‍ത്തിയത്. തോളെല്ലിന് ഗുരുതരമായി പരുക്കേറ്റ സന്ധ്യ കൊല്ലത്തെ സ്വകാര്യ ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലാണ്.