കൊച്ചി: മുണ്ടക്കൈ ദുരന്തത്തിലെ സര്‍ക്കാര്‍ കണക്കുകള്‍ പുറത്ത്. ദുരിതബാധിതര്‍ക്ക് നല്‍കിയതിനെക്കാള്‍ തുക ചെലവഴിച്ചത് വളണ്ടിയര്‍മാര്‍ക്കാണ് എന്നാണ് പുറത്തുവന്ന കണക്കുകള്‍ പറയുന്നത്. ഹെക്കോടതിയില്‍ സര്‍ക്കാര്‍ സമര്‍പ്പിച്ച സത്യവാങ്മൂലത്തിനൊപ്പമുള്ള മെമ്മോറണ്ടത്തിലാണ് കണക്കുകള്‍ വിശദമാക്കിയിരിക്കുന്നത്. 

ഒരു മൃതദേഹം സംസ്‌കരിക്കാന്‍ 75,000 രൂപ ചെലവായെന്നാണ് സര്‍ക്കാര്‍ നല്‍കിയ കണക്കില്‍ പറയുന്നത്. ഇതനുസരിച്ച് 359 മൃതദേഹങ്ങള്‍ സംസ്‌ക്കരിക്കാന്‍ 2,76,75,000 രൂപ ചെലവിട്ടു. വളണ്ടിയര്‍മാര്‍ക്കും ട്രൂപ്പുകള്‍ക്കും ഗതാഗതം 4 കോടി, ഭക്ഷണം, വെള്ളം 10 കോടി, താമസം 15 കോടി, ബെയ്‌ലി പാലത്തിന്റെ നിര്‍മാണത്തിന് 1 കോടി, ടോര്‍ച്ച്, റെയില്‍ കോട്ട്, കുട, ബൂട്ട് 2.98 കോടി, മെഡിക്കല്‍ സഹായം 2.2 കോടി രൂപ ചെലവഴിച്ചുവെന്നാണ് സര്‍ക്കാര്‍ കണക്കില്‍ പറയുന്നത്.

ദുരിതാശ്വാസ ക്യാമ്പില്‍ നാലായിരത്തോളം ആളുകളാണ് ഉണ്ടായിരുന്നത്. ഇവര്‍ക്ക് ഭക്ഷണം എട്ട് കോടി, വസ്ത്രം 11 കോടി, ജനറേറ്റര്‍ ഏഴ് കോടി, വൈദ്യസഹായം എട്ട് കോടി രൂപയുമാണ് ചെലവായത്.