ഇന്നലെ ഈഡന്‍ഗാര്‍ഡന്‍സില്‍ നടന്ന കൊല്‍ക്കത്ത-ഹൈദരാബാദ് മത്സരം ആവേശത്തോടെയാണ് കാണികള്‍ സ്വീകരിച്ചത്. റസ്സലും ക്ലാസനും തീര്‍ത്ത വെടിക്കെട്ട് ബാറ്റിംഗ് കാണികള്‍ക്ക് ഒരു ദൃശ്യവിരുന്നായി. തുടരെ വിക്കറ്റുകള്‍ വീണ്ചുരുങ്ങിയ സ്‌കോറില്‍ പുറത്താകുമെന്ന് കരുതിയ കൊല്‍ക്കത്തയെ റസലാണ് 200 കടത്തിയത്. തലങ്ങും വിലങ്ങും അദ്ദേഹം ബൗണ്ടറികള്‍ പായിച്ചു. കൊല്‍ക്കത്തയിലെ ചെറിയ ഗ്രൗണ്ടില്‍ കൂറ്റന്‍ സ്‌കോറുകള്‍ പിറക്കുമെന്ന് നേരത്തെ തന്നെ പ്രവചനങ്ങളുണ്ടായിരുന്നു.

മറുപടി ബാറ്റിംഗിനിറങ്ങിയ ഹൈദരാബാദിന് റണ്‍മല ചെയ്‌സ് ചെയ്യണമെങ്കില്‍ റസലിനെ പോലൊരു ഇന്നിംഗ്‌സ് ആവശ്യമായിരുന്നു. അവിടെയാണ് ക്ലാസന്‍ ഹൈദരാബാദിന് രക്ഷയ്‌ക്കെത്തിയത്. വിജയിക്കാനായില്ലെങ്കില്‍കൂടി നല്ലൊരു പോരാട്ടം കാഴ്ചവെക്കാന്‍ അദ്ദേഹത്തിന് കഴിഞ്ഞു.

മിസ്ട്‌റി സ്പിന്നര്‍ വരുണ്‍ ചക്രവര്‍ത്തിയെയും കോടിക്കിലുക്കവുമായെത്തിയ മിച്ചല്‍ സ്റ്റാര്‍ക്കിനെയും ക്ലാസന്‍ നിന്തരം അതിര്‍ത്തിവര കടത്തി. അവസാന ഒരോവറില്‍ സ്റ്റാര്‍ക്ക് 26 റണ്‍സാണ് വിട്ടുകൊടുത്തത്. ഈയിടെ സമാപിച്ച എസ്എ ടി20 ലീഗില്‍ മികച്ച ഫോമിലായിരുന്നു ക്ലാസന്‍. അത് അദ്ദേഹം ഐപിഎല്ലിലും തുടരുകയാണ്. സ്പിന്നര്‍മാരെയും പേസര്‍മാരെയും ഒരേപോലെ അക്രമിച്ചു കളിക്കാനുള്ള കഴിവാണ് അദ്ദേഹത്തെ വ്യത്യസ്ഥനാക്കുന്നത്. എന്തുതന്നെയായാലും ഈ സീസണില്‍ ഹൈദരാബാദിന് തുറുപ്പുചീട്ട് ക്ലാസന്‍ തന്നെയായിരിക്കുമെന്നതില്‍ സംശയമില്ല.