ഭോപ്പാല്‍ വൈറോളജി ഇന്‍സ്റ്റിറ്റ്യൂട്ടിലെ വിദഗ്ധര്‍ നാളെ ജില്ലയിലെത്തും
കോഴിക്കോട്: നിപാ സാംപിള്‍ പരിശോധനയ്ക്കായി കോഴിക്കോട് മെഡിക്കല്‍ കോളജില്‍ പ്രത്യേക ലാബ് പൂര്‍ണ സജ്ജം. ഇന്ന് രാവിലെ മുതല്‍ സമ്പര്‍ക്കപ്പട്ടികയിലുള്ളവരുടെ സാംപിള്‍ പ്രത്യേകം സജ്ജമാക്കിയ റീജ്യനല്‍ വൈറല്‍ റിസര്‍ച് ആന്‍ഡ് ഡയഗനോസ്റ്റിക് ലബോറട്ടറിയില്‍ പരിശോധിക്കും. ലാബിലേക്കാവശ്യമായ ട്രൂനാറ്റ് മെഷീനും എത്തിച്ചു. മറ്റ് സൗകര്യങ്ങളെല്ലാം മെഡിക്കല്‍ കോളജ് മൈക്രോബയോളജി ലാബില്‍ നിലവിലുണ്ടെന്ന് അധികൃതര്‍ പറഞ്ഞു. മെഡിക്കല്‍ കോളജ് മൈക്രോബയോളജി ലാബിന്റെ ഭാഗമായാണ് നിപാ ലാബ് പ്രവര്‍ത്തിക്കുക. ലാബിന്റെ പ്രവര്‍ത്തനങ്ങള്‍ക്ക് നേതൃത്വം നല്‍കാനായി നാഷനല്‍ ഇന്‍സ്റ്റിറ്റ്യൂട്ട് ഓഫ് വൈറോളജിയിലെ 12 അംഗ വിദഗ്ധസംഘം ഇന്നലെ കോഴിക്കോട്ടെത്തിയിട്ടുണ്ട്. പൂനെയില്‍നിന്നും ആലപ്പുഴയില്‍ നിന്നുമുള്ള സംഘമാണ് പരിശോധനകള്‍ നടത്തുക. നിലവില്‍ 24 മണിക്കൂറിനകം നിപാ പരിശോധനഫലം ലഭിക്കുന്നുണ്ട്. സമ്പര്‍ക്കപ്പട്ടികയിലുള്ള മുഴുവന്‍ പേര്‍ക്കും ഇന്നു തന്നെ പരിശോധന പൂര്‍ത്തിയാക്കാന്‍ സാധിക്കുമെന്നാണ് പ്രതീക്ഷിക്കുന്നത്.
പോയന്റ് ഓഫ് കെയര്‍, ആര്‍.ടി.പി.സി.ആര്‍ പരിശോധനകള്‍ ലാബില്‍ നടത്താന്‍ സാധിക്കും. ഇവിടെ നടത്തുന്ന പരിശോധനകളുടെ സാംപിള്‍ പൂനെ വൈറോളജി ഇന്‍സ്റ്റിറ്റ്യൂട്ടിലേക്കും അയക്കുമെന്നും മന്ത്രി വീണാ ജോര്‍ജ് പറഞ്ഞു. ഭോപ്പാല്‍ വൈറോളജി ഇന്‍സ്റ്റിറ്റ്യൂട്ടിലെ വിദഗ്ധര്‍ നാളെ ജില്ലയിലെത്തും.