മഞ്ചേരി: നേതാക്കള്‍ ഇഷ്ടാനുസരണം മാധ്യമങ്ങളെ കാണുന്നതിന് മുസ്‌ലിം ലീഗില്‍ നിയന്ത്രണം. പാര്‍ട്ടിയുടെ മീഡിയ വിങ്ങിന്റെ സൂക്ഷ്മ പരിശോധനയ്ക്ക് വിധേയമാക്കിയ കാര്യങ്ങള്‍ മാത്രമേ മാധ്യമങ്ങളോട് പങ്കുവയ്ക്കാവൂ എന്ന നയരേഖയിലെ നിര്‍ദേശം യോഗം അംഗീകരിച്ചു. നേതാക്കള്‍ കൂട്ടമായി മാധ്യമങ്ങളെ കാണുന്ന പതിവുരീതിയും ഇല്ലാതാക്കും. പ്രവര്‍ത്തകസമിതി യോഗത്തിനു ശേഷം സംസ്ഥാന ആക്ടിങ് ജനറല്‍ സെക്രട്ടറി പി.എം.എ സലാം തനിച്ച് വാര്‍ത്താസമ്മേളനം നടത്തിയത് ഇതിന്റെ ഭാഗമാണ്. 

സംസ്ഥാന കമ്മിറ്റി ഓഫിസില്‍നിന്ന് ചുമതലപ്പെടുത്തുന്നവര്‍ മാത്രമാകും ഇനി ചാനല്‍ ചര്‍ച്ചകളില്‍ പങ്കെടുക്കുക. മാധ്യമങ്ങളുമായി നിരന്തരം ആശയവിനിമയം നടത്താനും അനുകൂല വാര്‍ത്തകള്‍ സൃഷ്ടിക്കാനും സംസ്ഥാന കമ്മിറ്റിക്കു കീഴിലുള്ള മീഡിയ വിങ്ങിന് ചുമതല നല്‍കി.