ഇലക്ട്രിക്ക് സ്‌കൂട്ടറുകള്‍ ഇന്ത്യന്‍ മാര്‍ക്കറ്റില്‍ തരംഗമായിക്കൊണ്ടിരിക്കുകയാണ്. ലോകത്തില്‍ തന്നെ ഇവികളുടെ ഏറ്റവും മത്സരാധിഷ്ഠിതമായ വിപണികളിലൊന്നാണ് ഇന്ത്യ. എന്നാല്‍ ഇവികള്‍ ചാര്‍ജ് ചെയ്യുന്നത് ഉപഭോക്താക്കള്‍ക്ക് ഇപ്പോഴും തലവേദനയാണ്. ഇലക്ട്രിക്ക് ചാര്‍ജിങ് ഇക്കോ സിസ്റ്റം രാജ്യത്ത് അത്രത്തോളം വികസിച്ചിട്ടില്ലാത്തതിനാലാണ് ഇവികള്‍ ചാര്‍ജ് ചെയ്യുന്നതില്‍ ഉപഭോക്താക്കള്‍ ഇപ്പോഴും പ്രശ്‌നങ്ങള്‍ നേരിടുന്നത്.

എന്നാലിപ്പോള്‍ രാജ്യത്തെ ഇലക്ട്രിക് വാഹന ചാര്‍ജിംഗ് ഇക്കോസിസ്റ്റത്തില്‍ വലിയ മാറ്റങ്ങള്‍ കൊണ്ടു വരുന്നതിനായി ഹീറോയും ഏഥറും ഒരുമിക്കാനൊരുങ്ങുകയാണ്. ഈ സഹകരണത്തിലൂടെ ഇവി ഉപയോക്താക്കള്‍ക്ക് രാജ്യത്തുടനീളമുള്ള വിഡ, ഏഥര്‍ ഗ്രിഡുകള്‍ തടസമില്ലാതെ ഉപയോഗിക്കാന്‍ കഴിയും.

രണ്ട് കമ്പനികളും ചേര്‍ന്ന് രാജ്യത്തെ നൂറ് നഗരങ്ങളിലായി 1900ത്തിലധികം ഫാസ്റ്റ് ചാര്‍ജിങ് പോയിന്റുകളാണ് സ്ഥാപിച്ചിരിക്കുന്നത്. ഇതിന് പുറമെ ഇരു കമ്പനികളും ചേര്‍ന്ന് അനുയോജ്യമായ ഇടങ്ങളില്‍ കൂടുതല്‍ ചാര്‍ജിങ് പോയിന്റുകള്‍ സ്ഥാപിക്കും.
ബെംഗളൂരു ആസ്ഥാനമായി പ്രവര്‍ത്തിക്കുന്ന സ്റ്റാര്‍ട്ടപ്പ് കമ്പനിയായ ഏഥറിന് നിലവില്‍ 100 നഗരങ്ങളിലായി 1,400ലധികം ഫാസ്റ്റ് ചാര്‍ജറുകള്‍ ഉണ്ട്. ഈ വര്‍ഷാവസാനത്തോടെ ഇന്ത്യയിലുടനീളമുള്ള ഭാരത് പെട്രോളിയം കോര്‍പറേഷന്‍ ലിമിറ്റഡിന്റെ (BPCL) സ്ഥലങ്ങളില്‍ 100ലധികം ഫാസ്റ്റ് ചാര്‍ജറുകള്‍ സ്ഥാപിക്കാന്‍ ഏഥര്‍ പദ്ധതിയിടുന്നു.

രാജ്യത്തെ ഇരുചക്ര വാഹനമാര്‍ക്കറ്റിലെ ഏറ്റവും തലപ്പൊക്കമുള്ള കമ്പനികളിലൊന്നായ ഹീറോക്കും രാജ്യമെമ്പാടും നിരവധി ചാര്‍ജിങ് സ്റ്റേഷനുകളുണ്ട്. ഇരുകമ്പനികളും ചേരുമ്പോള്‍ ഇലക്ട്രിക്ക് ഇവി മാര്‍ക്കറ്റ് കൂടുതല്‍ ശക്തിപ്പെടുമെന്നാണ് വിദഗ്ധരുടെ വിലയിരുത്തല്‍.

Content Highlights:Hero MotoCorp Ather Energy partner to accelerate EV charging network in India