ദോഹ: ഖത്തർ ആശുപത്രിയുടെ പേരിൽ വ്യാജ ശമ്പള സർട്ടിഫിക്കറ്റ് ഹാജറാക്കിയ ഡോക്ടർക്ക് എതിരെ നടപടിയുമായി ആശുപത്രി അധികൃതർ. ഗാർഹിക പീഡനക്കേസിൽ നൽകേണ്ട ജീവനാംശം കുറച്ചു കിട്ടുന്നതിന് വേണ്ടിയാണ് മലയാളിയായ ഡോക്ടർ ഖത്തറിൽ ഇത്തരത്തിലൊരു കുറ്റകൃത്യത്തിൽ ഏർപ്പെട്ടത്. ഖത്തറിൽ ജോലി ചെയ്യുന്ന ഡോക്ടർ സമർപ്പിച്ച ശമ്പള സർട്ടിഫിക്കറ്റിന്റെ നിജസ്ഥിതി പരിശോധിക്കാൻ ഹൈക്കോടതി അഭിഭാഷക കമ്മിഷനെ നിയോഗിച്ചിരുന്നു. കമ്മീഷൻ നടത്തിയ അന്വേഷണത്തിലാണ് ഡോക്ടർ ഹാജറാക്കിയത് വ്യാജ സർട്ടിഫിക്കറ്റ് ആണെന്ന് കണ്ടെത്തിയത്.

ഖത്തറിലെ പ്രൈമറി ഹെൽത്ത് കെയർ കോർപറേഷനിൽ (പിഎച്ച്സിസി) പ്രവർത്തിക്കുന്ന തൃശൂർ സ്വദേശിയായ ഡോക്ടർക്കെതിരാണ് നടപടി ഉണ്ടായിരിക്കുന്നത്. ഒരു വർഷം തടവും നാടുകടത്തലും ആണ് ഖത്തർ കോടതി ഇദ്ദേഹത്തിന് വിധിച്ചിരിക്കുന്നത്. കായംകുളം സ്വദേശിനിയാണ് ഇദ്ദേഹത്തിന്റെ ഭാര്യ ഇവർ ഹരിപ്പാട് ജുഡീഷ്യൽ ഒന്നാം ക്ലാസ് മജിസ്ട്രേട്ട് കേടതിയിൽ ആണ് കേസ് ഫയൽ ചെയ്തത്. ഗാർഹിക പീഡനം ആരോപിച്ചാണ് ഇവർ കേസ് ഫയൽ ചെയ്തിരിക്കുന്നത്.

മൂന്നു മക്കളുടെ സംരക്ഷണ ചെലവും ജീവനാംശവും ആണ് യുവതി ഇതിൽ ആവശ്യപ്പെടുന്നത്. 11,549 ഖത്തർ റിയാൽ (ഏതാണ്ട് 2.6 ലക്ഷം രൂപ) മാത്രമേ ശമ്പളമുള്ളൂ എന്നു കാണിച്ചാണ് ഡോക്ടർ കോടതിയിൽ സർട്ടിഫിക്കറ്റ് ഹാജരാക്കിയത്. ഇതിനെതിരെ ഹൈക്കോടതിയിൽ അപ്പീൽ നൽകി. ഇതിൽ ആണ് അഭിഭാഷക കമ്മിഷൻ നേരിട്ടു പോയി പരിശോധിക്കട്ടെയെന്നു കോടതി ഉത്തരവിട്ടത്. എംഡി ബിരുദമുള്ള ഡോക്ടർ ആണ് 15 വർഷത്തിലേറെയായി ഖത്തറിൽ ജോലി ചെയ്യുന്നുണ്ട്. 7 ലക്ഷം രൂപ ശമ്പളമുണ്ടെന്നാണ് എതിർ ഭാഗം കോടതിയിൽ വാദിച്ചത്. അഭിഭാഷക കമ്മിഷനെ ഖത്തറിലേക്ക് അയയ്ക്കുന്നതിന്റെ ചെലവ് വഹിക്കാമെന്ന അവരുടെ അഭ്യർഥന കോടതി അംഗീകരിച്ചു.