ന്യൂഡല്‍ഹി: മലയാളി മാധ്യമ പ്രവര്‍ത്തകന്‍ സിദ്ദീഖ് കാപ്പന്റെ അറസ്റ്റിന് ഒരാണ്ട് പൂര്‍ത്തിയായ പശ്ചാത്തലത്തില്‍ ഡല്‍ഹിയില്‍ മാധ്യമപ്രവര്‍ത്തകരുടെ പ്രതിഷേധം. 

സിദ്ദീഖിനെ ഉടന്‍ മോചിപ്പിക്കുക, മാധ്യമ പ്രവര്‍ത്തനം തെറ്റായി കാണുന്ന പ്രവണത ഭരണകൂടം അവസാനിപ്പിക്കുക തുടങ്ങിയ മുദ്രാവാക്യങ്ങളുയര്‍ത്തിയായിരുന്നു പ്രതിഷേധം. യു.എ.പി.എ, ദേശദ്രോഹം തുടങ്ങിയ കുറ്റങ്ങള്‍ പൊലിസ് തോന്നിയപോലെ സിദ്ദീഖിനെതിരേ ചുമത്തിയെന്ന് പ്രതിഷേധം ഉദ്ഘാടനം ചെയ്ത പ്രസ്‌ക്ലബ് ഓഫ് ഇന്ത്യ പ്രസിഡന്റ് ഉമാകാന്ത് ലഖേര പറഞ്ഞു. സിദ്ദീഖിനെതിരേ തെളിവ് ലഭിക്കാത്തതിനാലാണ് പൊലിസിന് 90 ദിവസത്തിനകം കുറ്റപത്രം സമര്‍പ്പിക്കാന്‍ സാധിക്കാതിരുന്നത്. എന്നിട്ടും സിദ്ദീഖിന് ജാമ്യം നിഷേധിച്ച നടപടി നിരാശയുണ്ടാക്കുന്നതാണെന്നും അദ്ദേഹം വ്യക്തമാക്കി. ഡല്‍ഹി ജേണലിസ്റ്റ് യൂനിയനും കേരള പത്രപ്രവര്‍ത്തക യൂനിയനും സമരത്തില്‍ പങ്കെടുത്തു. ഹത്രാസിലേക്കുള്ള യാത്രാമധ്യേ സിദ്ദീഖിനൊപ്പം അറസ്റ്റിലായ പോപ്പുലര്‍ ഫ്രണ്ട് പ്രവര്‍ത്തകരുടെ കുടുംബങ്ങളും ഇന്നലെ ഡല്‍ഹിയിലെത്തി മാധ്യമങ്ങളെ കണ്ടു.