ദുബൈ: മിഡില്‍ ഈസ്റ്റിലെ ഏറ്റവും വലിയ ജൈവ-പ്രകൃത്യുല്‍പന്ന പ്രദര്‍ശനമായ 'ഓര്‍ഗാനിക് ആന്‍ഡ് നാചുറല്‍ പ്രൊഡക്റ്റ് എക്‌സ്‌പോ' ദുബൈ വേള്‍ഡ് ട്രേഡ് സെന്ററില്‍ ആരംഭിച്ചു. ദുബൈ നഗരസഭാ ഡയറക്ടര്‍ ജനറല്‍ എഞ്ചി.ദാവൂദ് അബ്ദുറഹമാന്‍ അല്‍ ഹാജിരി ഉദ്ഘാടനം ചെയ്തു. മൂന്ന് ദിവസം നീണ്ടു നില്‍ക്കുന്ന പ്രദര്‍ശനത്തില്‍ ഇന്ത്യയടക്കം 63 രാജ്യങ്ങളില്‍ നിന്നുള്ള 300ലധികം പ്രദര്‍ശകര്‍ പങ്കെടുക്കുന്നു.
മിഡില്‍ ഈസ്റ്റിലെ ജൈവ, പ്രകൃതി ഉല്‍പന്നങ്ങള്‍ക്കായുള്ള ഏറ്റവും വലിയ വ്യാപാര പരിപാടിയാണിതെന്ന് എക്‌സ്‌പോ മാനേജര്‍ ഷിനു പിള്ള പറഞ്ഞു. കാലാവസ്ഥാ വ്യതിയാന, പരിസ്ഥിതി മന്ത്രാലയത്തിന്റെ രക്ഷാകര്‍തൃത്വത്തില്‍ സംഘടിപ്പിക്കുന്ന പ്രദര്‍ശനം തനി നാടന്‍-ജൈവ ഉല്‍പന്നങ്ങള്‍ക്ക് മികച്ച വിപണിയാണെന്ന് എക്‌സ്‌പോ ഉദ്ഘാടനം ചെയ്ത അല്‍ ഹാജിരി അഭിപ്രായപ്പെട്ടു. ഓര്‍ഗാനിക് രീതിയില്‍ വളര്‍ത്തിയ പഴങ്ങളും പച്ചക്കറികളും മറ്റുല്‍പന്നങ്ങളും ഇവിടെ കാണാം.

കഴിഞ്ഞ 21 വര്‍ഷത്തിനിടയില്‍ പ്രകൃതിദത്തവും ജൈവികവുമായ ഉല്‍പന്നങ്ങള്‍ ഉള്‍ക്കൊള്ളുന്ന വിവിധ വിഭാഗങ്ങളിലായി മിഡില്‍ ഈസ്റ്റിലെ ഏറ്റവും വലിയ സോഴ്‌സിംഗ് പ്‌ളാറ്റ്‌ഫോമായി എക്‌സ്‌പോ വളര്‍ന്നു. ഈ വര്‍ഷം എക്‌സ്‌പോയില്‍ സൂപര്‍ ഫുഡ്‌സ് പവലിയന്‍, ഫ്രഷ് & പെറിഷബിള്‍സ് കോര്‍ണര്‍, ഡേറ്റ് പവലിയന്‍ എന്നിവയുള്‍പ്പെടെ നിരവധി പുതിയ സവിശേഷതകള്‍ ചേര്‍ത്തിട്ടുണ്ട്. ഓര്‍ഗാനിക് കമ്പനികളുടെ പ്രാതിനിധ്യത്തില്‍ ഇത്തവണ 22 ശതമാനം വളര്‍ച്ച വര്‍ധനയുണ്ടെന്ന് ഷിനു പിള്ള വെളിപ്പെടുത്തി. ലോകമെങ്ങും ഓര്‍ഗാനിക് ഉല്‍പന്നങ്ങള്‍ക്ക് വലിയ സ്വീകാര്യതുണ്ട്. വിപണി ആവശ്യകതക്കനുസൃതമായി സുസ്ഥിരതയും ഭക്ഷ്യ സുരക്ഷയും കൈവരിക്കാനുള്ള സര്‍ക്കാറിന്റെ സംരംഭങ്ങളുടെ യഥാര്‍ത്ഥ പ്രതിഫലനമാണ് എക്‌സ്‌പോ. ഇതിന്റെ ഫലമായാണ് വലുപ്പത്തില്‍ മാത്രമല്ല പങ്കെടുക്കുന്ന രാജ്യങ്ങളുടെ എണ്ണത്തിലും വര്‍ധനയുണ്ടായിട്ടുള്ളത്. മിഡില്‍ ഈസ്റ്റ് ഓര്‍ഗാനിക് ആന്‍ഡ് നാച്ചുറല്‍ പ്രൊഡക്ട് എക്‌സ്‌പോയില്‍ ഏകദേശം 46 രാജ്യങ്ങളുടെ പങ്കാളിത്തമുണ്ട്. നിര്‍മാതാക്കളും വിതരണക്കാരും യുഎഇയില്‍ ഒത്തുചേരുന്നതിനാല്‍ ആഗോള ജൈവ വ്യവസായത്തിന്റെ കേന്ദ്ര ബിന്ദുവായി ദുബൈ മാറും. ഓണ്‍ലൈന്‍ വ്യാപാര ആസൂത്രണ പരമ്പരയില്‍ ലോക്കല്‍ ബയര്‍മാരെയും ഇന്റര്‍നാഷണല്‍ സെല്ലര്‍മാരെയും ബന്ധിപ്പിക്കുന്ന ഓര്‍ഗാനിക് മജ്‌ലിസ് പ്രധാനമാണ്.

20,000ത്തിലധികം ബയര്‍മാരെയും വിതരണക്കാരെയും ക്ഷണിച്ചിട്ടുണ്ട്. ഒരു വര്‍ഷം മുഴുവന്‍ നീണ്ടുനില്‍ക്കുന്ന ഓണ്‍ലൈന്‍ പ്‌ളാറ്റ്‌ഫോം ആണ് മിഡില്‍ ഈസ്റ്റ് ഓര്‍ഗാനിക് ആന്‍ഡ് നാച്ചുറല്‍ പ്രൊഡക്ട്‌സ് എക്‌സ്‌പോ. വിലാസം:  www.arabianorganics.com