തിരുവനന്തപുരം: എന്‍ജിനീയറിങ് പ്രവേശന പരീക്ഷയിലെ ആദ്യ 100 റാങ്കുകളില്‍ 21 പേരും എറണാകുളം ജില്ലക്കാര്‍. തിരുവനന്തപുരം രണ്ടാം സ്ഥാനവും(17), കോഴിക്കോട് (11) മൂന്നാം സ്ഥാനവും സ്വന്തമാക്കി.
ആദ്യ 100 റാങ്കില്‍ ആണ്‍കുട്ടികളാണ് മുന്നില്‍.78 ആണ്‍കുട്ടികളും 22 പെണ്‍കുട്ടികളുമാണ് ആദ്യ 100 റാങ്കുകളില്‍ ഇടം പിടിച്ചത്. തിരുവനന്തപുരത്ത് നിന്നും 5,834 പേര്‍ റാങ്ക് പട്ടികയില്‍ ഇടം നേടി. ഇതില്‍ 152 പേര്‍ ആദ്യ 1000 റാങ്കില്‍ ഉള്‍പ്പെട്ടു. എറണാകുളത്ത് നിന്ന് 5,512 പേര്‍ പട്ടികയില്‍ ഇടം നേടി. ഇതില്‍ 174 പേര്‍ക്ക് ആദ്യ 1,000 റാങ്കിനുള്ളില്‍ സ്ഥാനം ലഭിച്ചു. തൃശൂരില്‍ നിന്ന് 4,897 പേരാണ് പട്ടികയില്‍ ഇടംപിടിച്ചത്. ഇതില്‍ 89 പേര്‍ ആദ്യ ആയിരത്തിലുണ്ട്. ആകെ, 38,733 ആണ്‍കുട്ടികളും 35,244 പെണ്‍കുട്ടികളും പരീക്ഷ എഴുതിയിരുന്നു. ഇതില്‍ 25,920 പെണ്‍കുട്ടികളും 25,111 ആണ്‍കുട്ടികളും യോഗ്യത നേടി. 24,143 പെണ്‍കുട്ടികളും 23,486 ആണ്‍കുട്ടികളുമാണ് റാങ്ക് പട്ടികയില്‍ ഇടം പിടിച്ചത്.
ഫാര്‍മസിയില്‍ 60,889 വിദ്യാര്‍ഥികള്‍ പരീക്ഷ എഴുതിയതില്‍ 48,556 പേര്‍ റാങ്ക് പട്ടികയില്‍ ഇടം നേടി. ഇതില്‍ 35,325 പെണ്‍കുട്ടികളും 13,231 ആണ്‍കുട്ടികളുമുണ്ട്. ആര്‍ക്കിടെക്ചറില്‍ 2,816 വിദ്യാര്‍ഥികളാണ് റാങ്ക് പട്ടികയിലുള്ളത്. ഇതില്‍ 1,803 പേര്‍ പെണ്‍കുട്ടികളും 1,013 ആണ്‍കുട്ടികളുമാണ്. എന്‍ജിനീയറിങ്ങില്‍ എച്ച്.എസ്.ഇ(കേരള) വിഭാഗത്തില്‍ പരീക്ഷ എഴുതിയ 32,180 പേരില്‍ 2,112 വിദ്യാര്‍ഥികള്‍ ആദ്യ അയ്യായിരം റാങ്കില്‍ ഇടംപിടിച്ചു. അതേസമയം, സി.ബി.എസ്.ഇ വിഭാഗത്തിലെ 13,841 വിദ്യാര്‍ഥികളില്‍ 2,602 പേരും ഐ.സി.എസ്.ഇയിലെ 1,144 വിദ്യാര്‍ഥികളില്‍ 242 പേരും ആദ്യ അയ്യായിരം റാങ്കില്‍ ഇടം പിടിച്ചിട്ടുണ്ട്.