കല്‍പ്പറ്റ: ലിംഗനീതിയുടെ ഏറ്റവും മികച്ച ശീലങ്ങള്‍ ഉറപ്പുവരുത്തുമ്പോഴാണ് കാംപസുകളില്‍ ജനാധിപത്യത്തിന്റെയും സഹാനുഭൂതിയുടെയും ആത്മാവ് വിടരുന്നതെന്ന് ഗവര്‍ണര്‍ ആരിഫ് മുഹമ്മദ് ഖാന്‍.
കേരള വെറ്ററിനറി ആന്‍ഡ് അനിമല്‍ സയന്‍സസ് യൂനിവേഴ്‌സിറ്റിയുടെ മൂന്നാമത് ബിരുദദാന സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
സ്ത്രീധനത്തിനെതിരായ സര്‍വകലാശാലയുടെ കാംപയിന് പിന്തുണ നല്‍കി ബിരുദധാരികളെ അഭിനന്ദിച്ച ഗവര്‍ണര്‍ കാംപസിലെ ആരോഗ്യകരമായ പരസ്പര ബന്ധത്തിന്റെ ആവശ്യകത ഊന്നിപ്പറഞ്ഞു. സര്‍വകലാശാലയിലെ വിവിധ കോഴ്‌സുകളിലായി ഉന്നതവിജയം നേടിയ 27 വിദ്യാര്‍ഥികള്‍ക്ക് സ്വര്‍ണമെഡലുകളും ഗവര്‍ണര്‍ സമ്മാനിച്ചു. മന്ത്രി ജെ ചിഞ്ചുറാണി മുഖ്യാതിഥിയായി. സര്‍വകലാശാല വൈസ് ചാന്‍സലര്‍ ഡോ. എം.ആര്‍ ശശീന്ദ്രനാഥ്, രജിസ്ട്രാര്‍ പി. സുധീര്‍ ബാബു, എം.എല്‍.എമാരായ അഡ്വ. ടി സിദ്ദിഖ്, വാഴൂര്‍ സോമന്‍ സംബന്ധിച്ചു.