വാഷിങ്ടണ്‍:അമേരിക്കയുടെ ആണവ അന്തര്‍വാഹിനി ഏഷ്യന്‍ മേഖലയിലെ കടലില്‍ അജ്ഞാതവസ്തുവുമായി കൂട്ടിയിടിച്ച് തകരാര്‍ സംഭവിച്ചുവെന്ന് യു.എസ് നാവികസേന. കൂട്ടിയിടിയില്‍ അന്തര്‍വാഹനിയിലുണ്ടായിരുന്ന 15 ഓളം യുഎസ് നാവികര്‍ക്ക് പരുക്കേറ്റിട്ടുണ്ട്.

'യുഎസ്എസ് കണക്ടിക്യുട്ട്' എന്ന ആണവ അന്തര്‍വാഹിനിയാണ് കൂട്ടിയിടിച്ചത്. ചൈന അവകാശവാദമുന്നയിക്കുന്ന ദക്ഷിണ ചൈനാ കടലിലാണ് യുഎസ്എസ് കണക്ടികട് ഉണ്ടായിരുന്നതെന്നാണ് റിപ്പോര്‍ട്ട്.

അന്തര്‍വാഹിനിയിലെ ആണവ പ്ലാന്റിനേയും മറ്റും കൂട്ടിയിടി ബാധിച്ചിട്ടില്ല. പൂര്‍ണ്ണമായും പ്രവര്‍ത്തന സജ്ജമാണ് ഇത്. അന്തര്‍വാഹിനിയുടെ തകരാറിന്റെ വിശദാംശങ്ങളും അപകടത്തിന്റെ കാരണവും പരിശോധിച്ചുവരികയാണെന്ന് യു.എസ് നാവികസേന അറിയിച്ചു.