തിരുവനന്തപുരം: കോര്‍പറേഷനിലെ നികുതിവെട്ടിപ്പ് കേസില്‍ ഒളിവിലായിരുന്ന ഓഫിസ് അറ്റന്‍ഡന്റ് അറസ്റ്റില്‍. ശ്രീകാര്യം സോണല്‍ ഓഫിസിലെ ഓഫിസ് അറ്റന്‍ഡന്റ് ബിജുവിനെയാണ് ശ്രീകാര്യം പൊലിസ് അറസ്റ്റ് ചെയ്തത്. ഇന്ന് പുലര്‍ച്ചെ കല്ലറയില്‍ നിന്നാണ് പൊലിസ് ബിജുവിനെ അറസ്റ്റ് ചെയ്തത്.

നികുതി തട്ടിപ്പ് വിവാദമായതോടെ സസ്‌പെന്‍ഷനിലായിരുന്ന ബിജു ഒളിവിലായിരുന്നു. കേസിലെ ആദ്യ അറസ്റ്റാണിത്.

ശ്രീകാര്യം, ആറ്റിപ്ര, നേമം എന്നീ മൂന്ന് സോണല്‍ ഓഫീസിലൂടെയാണ് നികുതി വെട്ടിപ്പ് നടന്നത്. ഏകദേശം 33 ലക്ഷം രൂപയുടെ വെട്ടിപ്പ് നടന്നുവെന്നാണ് ഓഡിറ്റ് വിഭാഗം കണ്ടെത്തിയിരുന്നത്.

നികുതിയായിട്ടും അല്ലാതെയും കിട്ടുന്ന പണം തൊട്ടടുത്ത ദിവസം തന്നെ നഗരസഭാ സെക്രട്ടറിയുടെ അക്കൗണ്ടില്‍ നിക്ഷേപിക്കേണ്ടതുണ്ട്. എന്നാല്‍ ഈ തുക നിക്ഷേപിക്കാതെ അടിച്ചുമാറ്റിയെന്നാണ് കേസ്. സംഭവത്തില്‍ ഏഴ് ജീവനക്കാരെ നേരത്തെ കോര്‍പറേഷന്‍ സസ്പെന്‍സ് ചെയ്തിരുന്നു. നികുതി അടച്ച ആര്‍ക്കും പണം നഷ്ടമാകില്ലെന്ന് കോര്‍പറേഷന്‍ അറിയിച്ചിരുന്നു.