കൊച്ചി: കിഴക്കമ്പലത്തെ അക്രമസംഭവങ്ങളുമായി ബന്ധപ്പെട്ട് പൊലിസ് കസ്റ്റഡിയിലെടുത്ത 164 പേരില്‍ വെറും 13 പേര്‍ മാത്രമാണ് യഥാര്‍ഥപ്രതികളെന്ന് കിറ്റക്സ് എം.ഡി. സാബു.എം. ജേക്കബ്. 151 നിരപരാധികളെ പൊലിസ് എന്തിന് കസ്റ്റഡിയില്‍ എടുത്തുവെന്ന് അദ്ദേഹം ചോദിച്ചു. രണ്ട് മണിക്കൂര്‍ കൊണ്ട് പൊലിസിന് ഇവരെ എങ്ങനെ തിരിച്ചറിയാനായി? 23 പേര്‍ മാത്രമാണ് സംഘര്‍ഷത്തില്‍ ഉള്‍പ്പെട്ടത്. സംഭവം യാദൃശ്ചികമാണെന്നും സാബു ജേക്കബ് പറഞ്ഞു.

മലയാളികളെ മാറ്റിനിര്‍ത്തി ഹിന്ദിക്കാരെ മാത്രമാണ് പൊലിസ് അറസ്റ്റ് ചെയ്തത് എന്നും സാബു ജേക്കബ് വാര്‍ത്താ സമ്മേളനത്തില്‍ പറഞ്ഞു. 10, 11, 12 എന്നീ മൂന്നു കോട്ടേഴ്‌സില്‍ നിന്നുള്ളവര്‍ മാത്രമാണ് പ്രതികള്‍ എന്ന് പൊലീസ് എങ്ങനെ മനസ്സിലാക്കി. പൊലീസിന്റെ നടപടിയില്‍ ദുരൂഹതയുണ്ട്. കിറ്റക്‌സിനെയും ട്വന്റി20യെയും തന്നെയും ഇല്ലാതാക്കാനാണ് സര്‍ക്കാര്‍ ശ്രമിക്കുന്നതെന്നും സാബു എം. ജേക്കബ് ആരോപിച്ചു.