പാലക്കാട്: അട്ടപ്പാടിയില്‍ ചികിത്സ വൈകിയതിനെ തുടര്‍ന്ന് ആദിവാസി വയോധികന്‍ മരിച്ചതായി പരാതി. മേലെ ഭൂതയാര്‍ ഊരിലെ ചെല്ലന്‍ (55) ആണ് മരിച്ചത്. ഇന്ന് തൃശൂര്‍ മെഡി. കോളജില്‍ വെച്ചായിരുന്നു മരണം. ആദ്യം ചികിത്സ തേടിയ കോട്ടത്തറ താലൂക്ക് ട്രൈബല്‍ സ്‌പെഷ്യാലിറ്റി ആശുപത്രിയില്‍ നിന്ന് ഐസിയു ആംബുലന്‍സ് ഇല്ലാത്തതിനാല്‍ ചെല്ലനെ തൃശൂരിലേക്ക് മാറ്റാന്‍ വൈകിയിരുന്നു. 

രണ്ട് ദിവസം മുന്‍പാണ് ചെല്ലനെ വനത്തില്‍ ബോധരഹിതനായ നിലയില്‍ കണ്ടെത്തിയത്. തുടര്‍ന്ന് കോട്ടത്തറ ആശുപത്രിയില്‍ ചികിത്സക്കായെത്തിച്ചു. ഇവിടെ നിന്ന് നാലുമണിക്കൂര്‍ കഴിഞ്ഞാണ് ഇദ്ദേഹത്തെ തൃശൂര്‍ മെഡിക്കല്‍ കോളജ് ആശുപത്രിയിലേക്ക് മാറ്റിയത്. 

കഴിഞ്ഞ ദിവസം മഴക്കെടുതിയില്‍ പരിക്കേറ്റ യുവാവും വിദഗ്ദ ചികിത്സ ലഭിക്കാന്‍ വൈകിയതിന് പിന്നാലെ മരണപ്പെട്ടിരുന്നു. അട്ടപ്പാടി സ്വദേശി ഫൈസലാണ് ശനിയാഴ്ച്ച മരിച്ചത്. കോട്ടത്തറ ആശുപത്രിയിലെ ഐസിയു ആംബുലന്‍സ് പ്രതിസന്ധിയാണ് ഫൈസലിനും വില്ലനായത്. പിന്നാലെയാണ് ഇന്ന് സമാന രീതിയില്‍ ചെല്ലനും ജീവന്‍ നഷ്ടമായിരിക്കുന്നത്.