പത്താം ക്ലാസ് വിജയിച്ചവര്‍ക്ക് കേന്ദ്ര സര്‍വിസില്‍ നിയമനം ലഭിക്കുന്ന  മള്‍ട്ടി ടാസ്‌കിങ് സ്റ്റാഫ് (നോണ്‍ ടെക്‌നിക്കല്‍), ഹവില്‍ദാര്‍ പരീക്ഷകള്‍ക്ക് സ്റ്റാഫ് സെലക്ഷന്‍ കമ്മിഷന്‍ (SSC) വിജ്ഞാപനം പ്രസിദ്ധീകരിച്ചു. ഒക്ടോബര്‍, നവംബര്‍ മാസങ്ങളിലാണ് പരീക്ഷ. കേന്ദ്ര സര്‍ക്കാറിന്റെ വിവിധ വകുപ്പുകളില്‍ മള്‍ട്ടി ടാസ്‌കിങ് സ്റ്റാഫ് (MTS) തസ്തികയില്‍ 4887 ഒഴിവുകളാണുള്ളത്. കൂടാതെ സെന്‍ട്രല്‍ ബ്യൂറോ ഓഫ് നാര്‍കോട്ടിക്‌സ് (CBN), സെന്‍ട്രല്‍ ബോര്‍ഡ് ഓഫ് ഇന്‍ഡയറക്ട് ടാക്‌സസ് & കസ്റ്റംസ് (CBIC) എന്നിവയിലെ ഹവില്‍ദാര്‍ തസ്തികയില്‍ 3439 ഒഴിവുകളുമുണ്ട്. ഒഴിവുകളുടെ എണ്ണത്തില്‍ മാറ്റംവരാം. ഗ്രൂപ്പ് 'സി' നോണ്‍ ഗസറ്റഡ്, നോണ്‍ മിനിസ്റ്റീരിയല്‍ തസ്തികയാണ്. വിവിധ മന്ത്രാലയങ്ങളിലും വകുപ്പുകളിലും ഓഫിസുകളിലുമാണ് അവസരം .

യോഗ്യത
2024 ഓഗസ്റ്റ് ഒന്നിനകം പത്താം ക്ലാസ് /തത്തുല്യ യോഗ്യത നേടിയിരിക്കണം. പ്രായം, ഹവില്‍ദാര്‍ തസ്തികയ്ക്ക് 18 27 നും എം.ടി.എസിന് 18 25 നുമിടയിലായിരിക്കണം. പട്ടിക വിഭാഗക്കാര്‍ക്ക് അഞ്ചും ഒ.ബി.സിക്കാര്‍ക്ക് മൂന്നും ഭിന്നശേഷിക്കാര്‍ക്ക് 10 വര്‍ഷവും ഇളവുണ്ട്.

പരീക്ഷ
മള്‍ട്ടിപ്പിള്‍ ചോയ്‌സ് ചോദ്യങ്ങളടങ്ങിയ കംപ്യൂട്ടര്‍ അധിഷ്ഠിത പരീക്ഷയാണ്. 45 മിനിറ്റ് വീതം ദൈര്‍ഘ്യമുള്ള രണ്ട് സെഷനുകളുണ്ട്. ഒന്നാം സെഷനില്‍ ന്യൂമെറിക്കല്‍ & മാത്തമാറ്റിക്കല്‍ എബിലിറ്റി, റീസണിങ് എബിലിറ്റി & പ്രോബ്ലം സോള്‍വിങ് എന്നിവയും രണ്ടാം സെഷനില്‍ ജനറല്‍ അവയര്‍നസ്, ഇംഗ്ലിഷ് ലാംഗ്വേജ് & കോംപ്രിഹെന്‍ഷന്‍ എന്നിവയുമാണ് വിഷയങ്ങള്‍. ഒന്നാം സെഷനില്‍ 40 ചോദ്യങ്ങള്‍,120 മാര്‍ക്ക്. രണ്ടാം സെഷനില്‍ 50 ചോദ്യങ്ങള്‍, 150 മാര്‍ക്ക്. ഒന്നാം സെഷനില്‍ നെഗറ്റീവ് മാര്‍ക്കില്ല. എന്നാല്‍ രണ്ടാം സെഷനില്‍ തെറ്റുത്തരത്തിന് ഒരു മാര്‍ക്ക് നഷ്ടപ്പെടും.

ഹവില്‍ദാര്‍ തസ്തികയിലേക്ക് കംപ്യൂട്ടറധിഷ്ഠിത പരീക്ഷയ്ക്കു പുറമെ ശാരീരികശേഷി പരിശോധനയും ശരീരിക യോഗ്യതാ പരീക്ഷയുമുണ്ടാകും.
പുരുഷന്മാര്‍ 15 മിനിറ്റില്‍ 1600 മീറ്ററും സ്ത്രീകള്‍ 20 മിനിറ്റില്‍ ഒരു കിലോമീറ്ററും നടക്കണം. പുരുഷന്മാര്‍ക്ക് 157.5 സെന്റീമീറ്റര്‍ ഉയരവും (എസ്.ടി വിഭാഗക്കാര്‍ക്ക് 5 സെന്റീമീറ്റര്‍ ഇളവുണ്ട്).സ്ത്രീകള്‍ക്ക് 152 സെന്റീമീറ്റര്‍ (എസ്.ടി വിഭാഗക്കാര്‍ക്ക് 2.5 സെന്റീമീറ്റര്‍ ഇളവ്) ഉയരവും വേണം. പുരുഷന്മാര്‍ക്ക്  81 സെന്റീമീറ്റര്‍ നെഞ്ചളവും 5 സെന്റീമീറ്റര്‍ വികാസവും വേണം. സ്ത്രീകള്‍ക്ക് 48 കിലോഗ്രാം (എസ്.ടി വിഭാഗത്തിന് 2 കിലോഗ്രാം ഇളവ് ) ഭാരം വേണം.

അപേക്ഷ
ssc.gov.in വഴി ജൂലൈ 31 രാത്രി 11 നകം അപേക്ഷ സമര്‍പ്പിക്കണം. വണ്‍ടൈം രജിസ്‌ട്രേഷന്‍ പൂര്‍ത്തിയാക്കിയതിന് ശേഷമാണ് അപേക്ഷിക്കേണ്ടത്. 100 രൂപയാണ് അപേക്ഷാ ഫീസ്. വനിതകള്‍ക്കും പട്ടിക വിഭാഗക്കാര്‍ക്കും ഭിന്ന ശേഷിക്കാര്‍ക്കും വിമുക്തഭടന്മാര്‍ക്കും ഫീസില്ല. ഓഗസ്റ്റ് ഒന്ന് വരെ ഫീസടക്കാം. ഓഗസ്റ്റ് 16, 17 തീയതികളില്‍ അപേക്ഷയിലെ അപാകതകള്‍ തിരുത്താം. ഇതിന് നിശ്ചിത ഫീസ് അടക്കേണ്ടി വരും. കേരളക്കാര്‍ക്ക് എറണാകുളം, കൊല്ലം, കോഴിക്കോട് ,കോട്ടയം, തൃശ്ശൂര്‍ തിരുവനന്തപുരം, ബെംഗളൂരു ,മൈസൂര്‍,മംഗലാപുരമടക്കം 14 കേന്ദ്രങ്ങളില്‍ പരീക്ഷയെഴുതാം. അപേക്ഷയില്‍ മൂന്ന് കേന്ദ്രങ്ങള്‍ മുന്‍ഗണനാക്രമത്തില്‍ സൂചിപ്പിക്കണം. പരീക്ഷാ സിലബസടക്കം വിശദാംശങ്ങളടങ്ങിയ പ്രോസ്പക്ടസ് ssc.gov.in ല്‍ ലഭ്യമാണ്.

ssc mts havildar recruitment sslc can apply till tomorrow 

കൂടുതൽ തൊഴിൽ വാർത്തകള്‍ക്ക് ഗ്രൂപ്പിൽ ജോയിന്‍ ചെയ്യുക