തിരുവനന്തപുരം: നെയ്യാറില്‍ കുളിക്കാനിറങ്ങിയ വിദ്യാര്‍ഥികള്‍ ഒഴുക്കില്‍പ്പെട്ട് ഒരാള്‍ക്ക് ദാരുണാന്ത്യം. കാട്ടാക്കട തൂങ്ങാംപാറ അമൃതം വീട്ടില്‍ അനില്‍ കുമാറിന്റെ മകന്‍ അഭിനവ് (18) ആണ് മരിച്ചത്. കാട്ടാക്കട പി.ആര്‍ വില്യം സ്‌കൂളിലെ പ്ലസ് ടു വിദ്യാര്‍ഥിയാണ് അഭിനവ്. കൂടെയുണ്ടായിരുന്ന സഹപാഠി അഭിനന്ദിനെ നാട്ടുകാര്‍ ചേര്‍ന്ന് രക്ഷപ്പെടുത്തി.

ഇന്നലെ വൈകുന്നേരം നാലുമണിയോടെ കീഴാറൂര്‍ ഈരാറ്റിന്‍പുറം ആറ്റുകടവിലായിരുന്നു അപകടം. ആറോളം വിദ്യാര്‍ഥികളടങ്ങുന്ന സംഘമാണ് ആറ്റില്‍ കുളിക്കാനായി എത്തിയത്. ഇതില്‍ നാലുപേര്‍ വെള്ളത്തിലിറങ്ങി. കുളിക്കുന്നതിനിടെ രണ്ടുപേര്‍ സുരക്ഷിതരായി കരയ്ക്ക് കയറിയെങ്കിലും അഭിനവും അഭിനന്ദും ഒഴുക്കില്‍പ്പെടുകയായിരുന്നു.

വിദ്യാര്‍ഥികളുടെ നിലവിളി കേട്ടെത്തിയ നാട്ടുകാര്‍ അഭിനന്ദിനെ വേഗത്തില്‍ കരയ്ക്കടുപ്പിച്ചു. എന്നാല്‍ അഭിനവ് നിമിഷങ്ങള്‍ക്കകം വെള്ളത്തില്‍ താഴ്ന്നുപോയി. വിവരമറിഞ്ഞ് സ്ഥലത്തെത്തിയ പൊലിസും അഗ്‌നിരക്ഷാസേനയും നാട്ടുകാരും ചേര്‍ന്ന് നടത്തിയ തിരച്ചിലിലാണ് അഭിനവിന്റെ മൃതദേഹം കണ്ടെടുത്തത്.

ALSO READ: വാണിജ്യ എല്‍പിജി വില വീണ്ടും വര്‍ധിപ്പിച്ചു; സിലിണ്ടറിന് 49 രൂപ കൂടി

ആര്യങ്കോട് പൊലിസ് സംഭവത്തില്‍ കേസെടുത്തിട്ടുണ്ട്. ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം നെയ്യാറ്റിന്‍കര ജനറല്‍ ആശുപത്രി മോര്‍ച്ചറിയിലേക്ക് മാറ്റി.

An 18-year-old Plus Two student, Abhinav, drowned in the Neyyar river at Keezharoor while bathing with classmates. Another student was rescued by locals after the group was caught in a tsrong current.