പാലക്കാട്: കഴിഞ്ഞദിവസങ്ങളിലായി സംസ്ഥാനത്ത് പെയ്ത ശക്തമായ മഴയെ തുടർന്ന് 12 പ്രധാന അണക്കെട്ടുകളിൽ മൂന്നാംഘട്ട മുന്നറിയിപ്പ് ലെവലായ റെഡ് അലർട്ടിലെത്തി. ഇടുക്കി ജില്ലയിലെ ലോവർ പെരിയാർ ( സംഭരണശേഷിയുടെ 100 ശതമാനം), മാട്ടുപ്പെട്ടി (98.58), കല്ലാർക്കുട്ടി (98.48), ഇരട്ടയാർ (50.76), കോഴിക്കോട് ജില്ലയിലെ കുറ്റിയാടി (100), വയനാട് ബാണാസുര സാഗർ (91.42), പത്തനംതിട്ടയിലെ മൂഴിയാർ (90.95), തൃശൂർ ജില്ലയിലെ വാഴാനി (100), പീച്ചി (100), പെരിങ്ങൽകത്ത് (89.93), പാലക്കാട് ജില്ലയിലെ മീങ്കര (99), മംഗലം (92) ഡാമുകളാണ് കേരളാ സ്റ്റേറ്റ് ഡിസാസ്റ്റർ മാനേജുമെൻ്റ് അതോറിറ്റി (കെ.എസ്.ഡി.എം.എ) പുറത്തുവിട്ട കണക്കുകൾ പ്രകാരം റെഡ് അലർട്ടിലെത്തിയിരിക്കുന്നത്. സംഭരണശേഷിയുടെ 91.15 ശതമാനവും ജലമെത്തിയതിനെ തുടർന്ന് ഇടുക്കി ജില്ലയിലെ പൊൻമുടി ഡാമിൽ രണ്ടാംഘട്ട മുന്നറിയിപ്പായ ഓറഞ്ച് അലർട്ടും പ്രഖ്യാപിച്ചിട്ടുണ്ട്.

 പാലക്കാട് ജില്ലയിലെ കാഞ്ഞിരപ്പുഴ (92), ശിരുവാണി (91), പോത്തുണ്ടി (86), ഇടുക്കി മലങ്കര (81) ഡാമുകളിൽ 75 ശതമാനത്തിലധികം ജലമെത്തിയിട്ടുണ്ട്. 1459.49 മില്യൻ ക്യുബിക് മീറ്റർ സംഭരണശേഷിയുള്ള സംസ്ഥാനത്തെ ഏറ്റവും കൂടുതൽ ജലം ഉൾക്കൊള്ളുന്ന ഡാമായ ഇടുക്കിയിൽ 800.93 മില്യൻ ക്യുബിക് മീറ്റർ ജലമെത്തിയിട്ടുണ്ട്. ഈ മാസം ഒൻപതിന് 555.826 മി.ക്യു. മീറ്റർ ജലമായിരുന്നു ഉണ്ടായിരുന്നത്.

1017.80 മി.ക്യു. മീറ്റർ സംഭരണശേഷിയുള്ള എറണാകുളം ഇടമലയാർ ഡാമിൽ 633.19 മി.ക്യു. മീറ്ററും 504.92 മില്യൻ ക്യുബിക് മീറ്റർ സംഭരണശേഷിയുള്ള കൊല്ലം കല്ലട ഡാമിൽ 330.6 മി.ക്യു. മീറ്ററും 226 മി.ക്യു. മീറ്റർ സംഭരണശേഷിയുള്ള മലമ്പുഴ ഡാമിൽ 152.53 മി.ക്യു. മീറ്റർ ജലവുമെത്തിയിട്ടുണ്ട്.