തിരുവനന്തപുരം: വയനാട്ടിലുണ്ടായ ഉരുൾപൊട്ടൽ ദേശീയ ദുരന്തമായി പ്രഖ്യാപിക്കണമെന്ന ആവശ്യം ഉയരുമ്പോഴും കേന്ദ്രം നിലപാട് വ്യക്തമാക്കുന്നില്ല. ദേശീയ ദുരന്തമായി പ്രഖ്യാപിക്കണമെന്ന് മന്ത്രിസഭായോഗം കേന്ദ്ര സർക്കാരിനോട് ആവശ്യപ്പെട്ടിരുന്നു. ഇതിനു പിന്നാലെ വയനാട്ടിലെത്തിയ ലോക്‌സഭ പ്രതിപക്ഷ നേതാവ് രാഹുൽ ഗാന്ധിയും ഈ ആവശ്യമുന്നയിച്ചിരുന്നു. ദുരന്ത മേഖല സന്ദർശിച്ച ശേഷം ആഘാതം എത്രയെന്നു മനസിലാക്കി ഡൽഹിയിലെത്തിയ ഗവർണർ ആരിഫ് മുഹമ്മദ് ഖാനും കേന്ദ്ര സർക്കാരിനോട് ഈ ആവശ്യം ഉന്നയിച്ചിട്ടുണ്ട്. ലോക്‌സഭയിൽ കേരളത്തിൽ നിന്നുള്ള എം.പിമാർ ഒന്നടങ്കം ഇക്കാര്യം ആവശ്യപ്പെട്ടിരുന്നു.

ദുരന്ത ബാധിതരെ സഹായിക്കാനും മറ്റുമായി കേന്ദ്ര-സംസ്ഥാന സർക്കാരുകളുടെ ദുരന്ത നിവാരണ ഫണ്ട് ഉപയോഗിക്കുമ്പോൾ ദേശീയ ദുരന്തമായി പരിഗണിക്കേണ്ടതല്ലേ എന്ന ചോദ്യമാണുയരുന്നത്. എന്നാൽ ദേശീയ ദുരന്തമായി പ്രഖ്യാപിക്കാൻ ഈ മാനദണ്ഡം പോരെന്നാണ് കേന്ദ്രം വ്യക്തമാക്കിയത്. കേന്ദ്ര വ്യവസ്ഥകൾ പ്രകാരമാണ് കേന്ദ്ര ദുരന്ത നിവാരണ ഫണ്ടിൽ നിന്ന് ദുരിതാശ്വാസ പ്രവർത്തനങ്ങൾ ലഭ്യമാക്കുന്നതെന്നാണ് കേന്ദ്രം വ്യക്തമാക്കുന്നത്.

ദേശീയ ദുരന്തമായി പ്രഖ്യാപിക്കപ്പെട്ടാൽ ദേശീയ ദുരന്ത നിവാരണ നിധിയിൽ നിന്നുള്ള അധിക സഹായം, ദേശീയ കണ്ടിജൻസി ഫണ്ടിൽ നിന്ന് അധികസഹായം, വായ്പാ തിരിച്ചടവിൽ ആശ്വാസം, ദുരിത ബാധിതകർക്ക് ഇളവോടെ വായ്പ എന്നീ പ്രയോജനങ്ങൾ സംസ്ഥാനത്തിന് ലഭിക്കും.