മലപ്പുറം: വയനാട്ടിലെ ഉരുൾപൊട്ടലിൽ 133 പേരെ കാണാനില്ലെന്ന സർക്കാരിന്റെ പട്ടിക പുറത്തുവരുമ്പോൾ, സംസ്ഥാനത്ത് കഴിഞ്ഞ ഏഴ് വർഷത്തിനിടെയുണ്ടായ വലിയ ദുരന്തങ്ങളിലും അപകടങ്ങളിലും പെട്ട് കാണാമറയത്തുള്ളത് 131 പേർ. ഓഖി ദുരന്തം, കവളപ്പാറ, പുത്തുമല, പെട്ടിമുടി എന്നീ ഉരുൾപൊട്ടലുകളിലും മത്സ്യബന്ധനത്തിനിടെയും കാണാതായവരാണിവർ. 
   
കാണാതായവർ ഏഴ് വർഷത്തിനിടെ തിരിച്ചു വരാതിരുന്നാൽ മാത്രമാണ് സർക്കാർ അവർ മരണപ്പെട്ടതായി കണക്കാക്കുന്നത്. 110 മത്സ്യത്തൊഴിലാളികളെയാണ് മത്സ്യബന്ധത്തിനിടെ സംസ്ഥാനത്ത് ഏഴ് വർഷത്തിനിടെ കാണാതായത്. ഇവരിൽ 94 പേരെ കാണാതായത് ഓഖി ദുരന്തത്തിലാണ്. തിരുവനന്തപുരം, കൊല്ലം, ആലപ്പുഴ, എറണാകുളം, മലപ്പുറം, കോഴിക്കോട്, കണ്ണൂർ ജില്ലകളിൽ നിന്നാണ് 110 മത്സ്യത്തൊഴിലാളികളെ കാണാതായത്.
  
2019 ഓഗസ്റ്റ് എട്ടിന് കവളപ്പാറ മുത്തപ്പൻ കുന്നിലുണ്ടായ ഉരുൾപ്പൊട്ടലിൽ 11 പേരെയാണ് കാണാതായത്. ഇതേ ദിവസം തന്നെയാണ് മേപ്പാടി പച്ചക്കാട് ഉരുൾപൊട്ടി പുത്തുമല ദുരന്തഭൂമിയായത്. 17 പേർമരിച്ച ദുരന്തത്തിൽ അഞ്ച് പേരെ ഇതുവരെ കണ്ടെത്താനായിട്ടില്ല. 
2020 ഓഗസ്റ്റ് ആറിനാണ് മൂന്നാർ രാജമല പെട്ടിമുടിയിൽ ഉരുൾപൊട്ടലിൽ 70 പേർ മരിച്ചത്. ഇതിൽ നാലു പേരെ ഇതുവരെ കണ്ടെത്താനായിട്ടില്ല.
   
ദുരന്തങ്ങളിൽ കാണാതായവരെക്കുറിച്ച് സർക്കാർ പരിശോധന പൂർത്തിയാക്കിയാലും കുടുംബങ്ങൾക്ക് മരണ സർട്ടിഫിക്കറ്റ് ലഭിക്കാറില്ല. പലപ്പോഴും നിയമപരമായ കാര്യങ്ങളിൽ ഇത് സാങ്കേതിക തടസങ്ങൾ സൃഷ്ടിക്കാറുണ്ട്. കാണാതായവർ മരിച്ചതായി കണക്കാക്കണമെങ്കിൽ ഏഴുവർഷം കഴിയണമെന്നാണ് നിയമം. ഇതിന് ശേഷമാണ് ഇവരുമായി ബന്ധപ്പെട്ട കാര്യങ്ങളിൽ നിയമപരമായ തീരുമാനം കൈക്കൊള്ളാനാവുക. സംഭവം നടന്ന് ഏഴ് വർഷം വരെ ഇവർ നിയമപ്രകാരം മരിച്ചവരാകുന്നില്ല.