കണ്ണൂര്‍: ചാലാട് പടന്നപ്പാലം സി.എച്ച് പാലിയേറ്റീവ് ആശുപത്രി അടച്ചുപൂട്ടാന്‍ ഡി.എം.ഒ നിര്‍ദേശിച്ചു. മൂന്ന് മാസത്തോളമായി ഇവിടെ ഡോക്ടറില്ലെന്നും രോഗികള്‍ക്കുള്ള സൗകര്യ പ്രശ്‌നവും മറ്റും ചൂണ്ടികാണിച്ച് ഡി.എം.ഒക്ക് ലഭിച്ച പരാതിയെ തുടര്‍ന്നാണ് നടപടി. 15 ദിവസത്തിനകം പൂട്ടണമെന്നാവശ്യപ്പെട്ട് ഡി.എം.ഒ നോട്ടിസ് നല്‍കിയത്.
കാന്‍സര്‍ രോഗികളായ ഒന്‍പതോളം പേര്‍ നിലവില്‍ ഇവിടെ ചികിത്സയിലുണ്ട്. ഇവരെ മറ്റൊരു സ്ഥാപനത്തിലേക്ക് മാറ്റി താമസിപ്പിക്കാതെ പൂട്ടാന്‍ അനുവധിക്കില്ലെന്ന് പറഞ്ഞു ഡിവിഷന്‍ കൗണ്‍സിലര്‍ പി.കെ രാഗേഷിന്റെ നേതൃത്വത്തില്‍ നാട്ടുകാര്‍ സംഘടിച്ചു.
നല്ല രീതിയില്‍ നടന്നുപോന്ന സ്ഥാപനം ലീഗിലെ ആഭ്യന്തര കലഹം കാരണമാണ് പൂട്ടാന്‍ പോകുന്നതെന്ന് പി.കെ രാഗേഷ് ആരോപിച്ചു. ട്രസ്റ്റ് ഭാരവാഹികളുടെയും നാട്ടുകാരുടെയും യോഗം നാളെ വൈകിട്ട് സി.ഐ ഓഫിസില്‍ വിളിച്ചു ചേര്‍ത്തിട്ടുണ്ട്.
രോഗികളെ വാരം സി.എച്ച് സെന്ററിലേക്ക് മാറ്റാനുള്ള നടപടികള്‍ സ്വീകരിക്കുന്നതിനിടെയാണ് നാട്ടുകാര്‍ സംഘടിച്ചെത്തിയതെന്ന് ട്രസ്റ്റ് ഭാരവാഹി ഹാരിസ് ഹാജി പറഞ്ഞു.