കണ്ണൂര്‍: കാഫിര്‍ സ്‌ക്രീന്‍ഷോട്ട് സി.പി.എം നേതാവ് കെ.കെ.ലതിക ഷെയര്‍ ചെയ്തത് തെറ്റാണെന്ന് മുന്‍ മന്ത്രിയും വടകര ലോക്‌സഭാ മണ്ഡലം സ്ഥാനാര്‍ഥിയുമായിരുന്ന കെ.കെ.ശൈലജ. സ്‌ക്രീന്‍ഷോട്ട് എന്തിന് ഷെയര്‍ ചെയ്തുവെന്ന് ചോദിച്ചപ്പോള്‍ പൊതുസമൂഹം അറിയേണ്ടതല്ലേ എന്നായിരുന്നു ലതികയുടെ മറുപടി. കാഫിര്‍ പോസ്റ്റ് നിര്‍മിച്ചത് ആരാണെങ്കിലും പിടിക്കപ്പെടണമെന്നും ശൈലജ പറഞ്ഞു.

ഇടതുപക്ഷപ്രസ്ഥാനത്തില്‍ പ്രവര്‍ത്തിക്കുന്നവര്‍ ഇങ്ങനെയൊരു പ്രവര്‍ത്തനം നടത്തില്ല. ഇടതുപക്ഷത്തിന്റെ പേരില്‍ ആരെങ്കിലും അങ്ങനെ ചെയ്തിട്ടുണ്ടെങ്കില്‍ അവര്‍ ശിക്ഷിക്കപ്പെടണം. കണ്ണൂര്‍ ജില്ലാ സെക്രട്ടറി തന്നെ സ്‌ക്രീന്‍ഷോട്ട് പ്രചരിപ്പിച്ച  ഗ്രൂപ്പുകളെ തള്ളി പറഞ്ഞിട്ടുണ്ട്. കാഫിര്‍ പോസ്റ്റ് മാത്രമല്ല മാധ്യമങ്ങള്‍ അന്വേഷിക്കേണ്ടത്. കാന്തപുരത്തിന്റെ പേരില്‍ വ്യാജ ലെറ്റര്‍ ഹെഡില്‍ വന്ന പ്രചാരണവും അന്വേഷിക്കണം.''  കെ.കെ. ശൈലജ പറഞ്ഞു.

'കാന്തപുരം അബൂബക്കര്‍ മുസ് ലിയാരുടെ ലെറ്റര്‍ ഹെഡ് കൃത്രിമമായി ക്രിയേറ്റ് ചെയ്തുകൊണ്ട് അതില്‍ എനിക്കെതിരായിട്ട് അദ്ദേഹം പറഞ്ഞുവെന്ന് വരുത്തുന്ന പോസ്റ്റ് വന്നിരുന്നു. ഇതെല്ലാം കുടുംബസദസ്സുകളിലാണ് പ്രചരിപ്പിച്ചത്. സ്ത്രീകളുടെയടക്കം ഇടയില്‍ വളരെ അനുകൂലമായ സാഹചര്യം ഇടതുപക്ഷത്തിനുണ്ടെന്ന് കണ്ടപ്പോഴാണ് ഇത്തരത്തിലുള്ള പ്രചരണ തന്ത്രങ്ങള്‍ അന്ന് സ്വീകരിച്ചിരുന്നത്. ആ കൂട്ടത്തില്‍ ഏറ്റവും ഒടുവില്‍ വന്നതാണ് കാഫിര്‍ പ്രയോഗം.'

കാഫിര്‍ പ്രചരണം സി.പി.എമ്മിന്റെ ഭീകര പ്രവര്‍ത്തനമെന്ന വി.ഡി. സതീശന്റെ ആരോപണത്തിന്, അങ്ങനെയെങ്കില്‍ കാന്തപുരത്തിന്റെ വ്യാജ ലെറ്റര്‍ ഹെഡ് ഇറക്കിയതും ഭീകര പ്രവര്‍ത്തനമാണെന്നായിരുന്നു ശൈലജയുടെ മറുപടി.