ചായക്കടയില്‍ നിന്നു കഴിക്കുന്ന വെട്ടു കേക്ക് നമ്മള്‍ അധികവും വീടുകളിലും ഉണ്ടാക്കാറുണ്ട്. നല്ല രുചിയുള്ളത് കൊണ്ടും കുറച്ചു ദിവസം വച്ച് കഴിക്കാമെന്നതു കൊണ്ടുമൊക്കെ വീട്ടമ്മമാര്‍  എപ്പഴും ഉണ്ടാക്കിവയ്ക്കുന്ന പലഹാരങ്ങളില്‍ ഒന്നാണിത്. വൈകുന്നേരമായാലും രാവിലെയായാലും ചായക്കൊപ്പം ഒരു കേക്ക് കഴിക്കുകയും ചെയ്യുന്നവരാണ് നമ്മള്‍. എങ്കില്‍ ഇന്നു നമുക്ക് ഇത് വളരെ എളുപ്പത്തിലൊന്നു തയാറാക്കി നോക്കാം. 

മുട്ട -4

സോഡാപ്പൊടി- കാല്‍ ടീസ്പൂണ്‍

ഏലക്കായ -അഞ്ച്

പഞ്ചസാര - മുക്കാല്‍ കപ്പ്

മൈദ -3  കപ്പ്

ഉപ്പ്

പാല് - ആവശ്യത്തിന്

തയാറാക്കുന്നവിധം

ഒരു മിക്‌സിയുടെ ജാറില്‍ ആദ്യം പഞ്ചസാരയും ഏലക്കായും കൂടി നന്നായി പൊടിച്ചെടുക്കുക. ഇത് ഒരു ബൗളിലേക്ക് ഇട്ടുകൊടുത്ത് മുട്ട പൊട്ടിച്ച് ഒഴിക്കുക. ഒരു വിസ്‌ക് ഉപയോഗിച്ച് ഇത് നന്നായി മിക്‌സ് ചെയ്യുക. മറ്റൊരു ബൗളില്‍ മൈദ എടുത്ത് അതിലേക്ക് ഉപ്പും സോഡാപ്പൊടിയും ചേര്‍ത്ത് നന്നായി മിക്‌സ് ചെയ്യുക.

 ശേഷം മുട്ട ചേര്‍ത്ത മിക്‌സ് ചേര്‍ത്ത് കുഴച്ചെടുക്കുക. പാല് കൂടി ആവശ്യമെങ്കില്‍ ഒഴിക്കാവുന്നതാണ്. നന്നായി കുഴച്ച് കുറച്ച് കട്ടിയുള്ള ഒരു മാവ് തയ്യാറാക്കുക. ഇത് കുറച്ചു സമയം മാറ്റിവയ്ക്കുക. ശേഷം ചപ്പാത്തി പലകയില്‍ വച്ച് പരത്തി നീളത്തില്‍ മുറിക്കുക. ഇനി ഇതിനെ ചെറിയ കഷണങ്ങളായി മുറിക്കാം. ഓരോ സ്‌ക്വയര്‍ കഷണങ്ങളിലും മുകള്‍വശത്തായി കത്തി ഉപയോഗിച്ച് രണ്ട് വെട്ട് ഇട്ടു കൊടുക്കുക. ഇനി ചൂടായ എണ്ണയിലേക്ക് ഇട്ട് നന്നായി ഫ്രൈ ചെയ്‌തെടുക്കുക. നല്ല ക്രിസ്പി കേക്ക് റെഡി.