എല്ലാവര്‍ക്കും ചിക്കന്‍ വിഭവങ്ങള്‍ ഇഷ്ടമാണ്. എന്നാല്‍ അതില്‍ എന്തെങ്കിലും വറൈറ്റി തിരയുന്നവരാണിന്നത്തെ തലമുറ.  അതില്‍ പ്രിയപ്പെട്ടതാണ് ബട്ടര്‍ ചിക്കന്‍. വളരെ പെട്ടെന്ന് തയ്യാറാക്കാവുന്ന ഒന്നാണ് ബട്ടര്‍ ചിക്കന്‍. ചപ്പാത്തിക്കും പത്തിരിക്കുമൊക്കെ ബെസ്റ്റ് കോമ്പിനേഷനുമാണ് ബട്ടര്‍ചിക്കന്‍. ഒന്നു തയാറാക്കി നോക്കിയാലോ... 

ആവശ്യമുള്ള ചേരുവകള്‍ 

ചിക്കന്‍ ഒരു കിലോ (എല്ലില്ലാത്ത കഷണം)
സവാള -4 
തക്കാളി -4 
ഇഞ്ചി വെളുത്തുള്ളി 

പേസ്റ്റ് - ഒരു ടേബിള്‍ സ്പൂണ്‍ 
ബട്ടര്‍ - ആവശ്യത്തിന്  
മഞ്ഞള്‍പൊടി-ഒരു നുള്ള് 
മുളകുപൊടി -3 സ്പൂണ്‍ 
കശുവണ്ടി പരിപ്പ് - ഒരു പിടി
ഫ്രഷ് ക്രീം -5 സ്പൂണ്‍

ഗരം മസാല - ടേബിള്‍ സ്പൂണ്‍ 
നാരങ്ങാ നീര് - ഒരു ടേബിള്‍ സ്പൂണ്‍ 
പഞ്ചസാര-ഒരു നുള്ള് 
ഏലക്ക -2 

തയ്യാറാക്കുന്ന വിധം

ഒരു പാത്രത്തില്‍ കഴുകിയവൃത്തിയാക്കിയ ചിക്കന്‍ ചെറിയ കഷണങ്ങളാക്കി അതിലേക്ക് ഉപ്പ്, മുളകുപൊടി പൊടി, ഇഞ്ചി വെളുത്തുള്ളി പേസ്റ്റ് എന്നിവ ചേര്‍ത്ത് നല്ലതുപോലെ മിക്‌സ് ചെയ്ത് അരമണിക്കൂര്‍ മാറ്റി വയ്ക്കുക. ശേഷം ചുവട് കട്ടിയുള്ള ഒരു കടായി അടുപ്പില്‍ വച്ച് ചൂടാകുമ്പോള്‍ അല്‍പം വെണ്ണ ഒഴിച്ച് അതിലേക്ക് ഇതിട്ട് ഫ്രൈ ചെയ്‌തെടുക്കുക. ഇതേ പാനില്‍ തന്നെ കുറച്ച് ബട്ടര്‍ ചേര്‍ത്ത് സവാള ,ഇഞ്ചി വെളുത്തുള്ളി പേസ്റ്റ് എന്നിവ നല്ലതുപോലെ വഴറ്റുക. ശേഷം ഇതിലേക്ക് തക്കാളി ഇട്ടശേഷം അല്‍പനേരം അടച്ചു വച്ച് വേവിയ്ക്കണം.

തക്കാളി നല്ലതുപോലെ വഴറ്റിക്കഴിഞ്ഞാല്‍ അതിലേക്ക് അല്‍പം കശുവണ്ടിപ്പരിപ്പും പിന്നീട് ബാക്കി വരുന്നമുളകുപൊടി ,ഇഞ്ചി വെളുത്തുള്ളി പേസ്റ്റ് ,ഉപ്പ്, ഗരം മസാല, നാരങ്ങാനീര്, ഏലക്ക, പഞ്ചസാര എന്നിവ ചേര്‍ത്ത് നല്ലതുപോലെ ഇളക്കി മിക്‌സ് ചെയ്യുക. ഒന്നു ചൂടാറിയ ശേഷം ഇതെല്ലാം നല്ലതുപോലെ അരച്ച് ഈ അരപ്പ് ഒരു അരിപ്പ ഉപയോഗിച്ച് അരിച്ച് ഒരു പാനിലേക്ക് ഒഴിക്കണം.

ശേഷം ഇതിലേക്ക് ബാക്കി വരുന്ന ബട്ടറും ഫ്രൈ ചെയ്തുവച്ച ചിക്കന്‍ കഷണങ്ങളും ചേര്‍ത്ത് നല്ലതുപോലെ ഇളക്കി കുറച്ച് നേരം വേവിച്ചെടുക്കണം. ആവശ്യമെങ്കില്‍ കുറച്ചു വെള്ളം ചേര്‍ക്കാം. ആവശ്യത്തിന് ഉപ്പുമിട്ട് ഫ്രഷ് ക്രീം ചേര്‍ത്ത് ഇളക്കുക. അടിപൊളി ബട്ടര്‍ ചിക്കന്‍ റെഡി.