തൊടുപുഴ: താന്‍ വിദേശത്താണെന്നു വീട്ടുകാരെ വിശ്വസിപ്പിച്ച ശേഷം കാണാതായ 27കാരനെ കൊച്ചിയില്‍ നിന്നു നെടുങ്കണ്ടം പൊലിസ് കണ്ടെത്തി. കൊച്ചിയില്‍ ജോലി ചെയ്തിരുന്ന എഴുകുംവയല്‍ സ്വദേശി കഴിഞ്ഞ ഒന്നിനാണ് ന്യൂസിലന്‍ഡില്‍ ജോലി കിട്ടിയതായി അറിയിച്ച് നാടുവിട്ടത്. വീട്ടുകാര്‍ തന്നെയാണ് യുവാവിനെ വിമാനത്താവളത്തില്‍ എത്തിച്ചത്.

എന്നാല്‍ വീട്ടുകാര്‍ക്ക് വിദേശത്തുള്ള ഫോട്ടോകള്‍ 27കാരന്‍ അയച്ചു നല്‍കുകയും ദിവസവും വീട്ടുകാരെ ഫോണില്‍ വിളിക്കുകയും ചെയ്തിരുന്നു. 20ാം തിയതിക്കു ശേഷം വിവരമൊന്നും പിന്നെ ഉണ്ടായിരുന്നില്ല. സുഹൃത്തില്‍ നിന്നു ഇയാള്‍ കൊച്ചിയില്‍ ഉള്ളതായി വീട്ടുകാര്‍ക്ക് വിവരം ലഭിച്ചു. പിന്നാലെയാണ് വീട്ടുകാര്‍ നെടുങ്കണ്ടം പൊലിസില്‍ പരാതി നല്‍കിയതും യുവാവിനെ കൊച്ചിയില്‍ നിന്നു കണ്ടെത്തിയതും.