തെല്‍ അവിവ്: ഗസ്സയിലെ വെടിനിര്‍ത്തലുമായി ബന്ധപ്പെട്ട് മധ്യസ്ഥ രാജ്യങ്ങളായ ഖത്തറും ഈജിപ്തും ഹമാസുമായി അനൗപചാരിക ചര്‍ച്ച.

ഖത്തര്‍ തലസ്ഥാനമായ ദോഹയിലാണ് ഹമാസുമായി മധ്യസ്ഥ രാജ്യങ്ങളുടെ നേതാക്കള്‍ ദീര്‍ഘനേരം ചര്‍ച്ച നടത്തി. ഖത്തര്‍ പ്രധാനമന്ത്രിയും വിദേശകാര്യ മന്ത്രിയുമായ മുഹമ്മദ് ബിന്‍ അബ്ദുര്‍റഹ്മാന്‍ ബിന്‍ ജാസിം ആല്‍ഥാനി, ഈജിപ്ത് ഇന്റലിജന്‍സ് മേധാവി അബ്ബാസ് കെമല്‍ എന്നിവരാണ് ഹമാസ് നേതാവ് ഖലീല്‍ അല്‍ ഹയ്യയുടെ നേതൃത്വത്തിലുള്ള സംഘവുമായി ചര്‍ച്ച നടത്തിയത്. 

നെതന്യാഹുവിന്റെ കടുംപിടിത്തം കാരണം വെടിനിര്‍ത്തല്‍ ചര്‍ച്ച വഴിമുട്ടിയിരിക്കെ, അമേരിക്കന്‍ പ്രസിഡന്റ് ജോ ബൈഡന്റെ നിര്‍ദേശ പ്രകാരമാണ് അനൗപചാരിക ചര്‍ച്ചയെന്നാണ് സൂചന. എന്നാല്‍ ചര്‍ച്ചയുടെ ഉള്ളടക്കം പുറത്തുവിടാന്‍ ഇരുവിഭാഗവും തയാറായില്ല. മധ്യസ്ഥ രാജ്യങ്ങളുടെ നീക്കം സ്വാഗതം ചെയ്ത ഹമാസ് ബൈഡന്റെയും യു.എന്‍ രക്ഷാസമിതിയുടെയും നിര്‍ദേശം മുന്‍നിര്‍ത്തിയുള്ള വെടിനിര്‍ത്തല്‍ കരാറിന് സന്നദ്ധമാണെന്ന് വ്യക്തമാക്കി. ആക്രമണം നിര്‍ത്തി സൈന്യം ഗസ്സ വിടണമെന്ന നിലപാടും ഹമാസ് ആവര്‍ത്തിച്ചു. പ്രഖ്യാപിത നിലപാടില്‍ മാറ്റമില്ലെന്നും യുദ്ധാനന്തര ഗസ്സയുടെ ഭാവി തീരുമാനിക്കുക ഫലസ്തീനികള്‍ മാത്രമായിരിക്കുമെന്നും ഹമാസ് അറിയിച്ചു.