കാസര്‍കോട്: നീലേശ്വരത്ത് അധ്യാപികയ്ക്ക് ക്ലാസ് മുറിയില്‍വെച്ച് പാമ്പുകടിയേറ്റു. നിലേശ്വരം രാജാസ് സ്‌കൂളിലെ അധ്യാപിക വിദ്യക്കാണ് പാമ്പുകടിയേറ്റത്. വിദ്യയെ ഉടനെ കാഞ്ഞങ്ങാട് താലൂക്ക് ആശുപത്രിയില്‍ പ്രവേശിപ്പിച്ചു. 

ഇന്ന് രാവിലെയായിരുന്നു സംഭവം. ഇന്ന് സ്‌കൂളില്‍ ഓണാഘോഷ പരിപാടികള്‍ ആയതിനാല്‍ കലാമത്സരങ്ങള്‍ നടക്കുന്നതിനിടെയാണ് പാമ്പുകടിയേറ്റത്. അധ്യാപികയുടെ കാലിനാണ് കടിയേറ്റത്. പാമ്പിനെ ആളുകള്‍ തല്ലികൊന്നു. വിഷമില്ലാത്ത പാമ്പാണ് കടിച്ചതെന്നാണ് വിവരം. അധ്യാപികയുടെ ആരോഗ്യനിലയില്‍ ആശങ്കപ്പെടേണ്ട സാഹചര്യമില്ലെന്ന് ആശുപത്രി അധികൃതര്‍ അറിയിച്ചു.