തിരുവനന്തപുരം: ഈ ഓണക്കാലത്തും റെക്കോര്‍ഡ് മദ്യവില്‍പ്പനയുമായി ബെവ്‌കോ. 818.21 കോടി രൂപയുടെ മദ്യമാണ് ഈ ഓണക്കാലത്ത് മാത്രം വിറ്റുപോയത്. ഈ മാസം ആറ് മുതല്‍ 17 വരെയുള്ള കണക്കാണിത്. 

കഴിഞ്ഞ വര്‍ഷം ഓണക്കാലത്ത് 809. 25 കോടിയുടെ മദ്യമാണ് വിറ്റഴിച്ചത്. കഴിഞ്ഞവര്‍ഷത്തെ അപേക്ഷിച്ച് ഇത്തവണ 9 കോടിയുടെ വര്‍ധനയാണ് മദ്യവില്‍പ്പനയില്‍ ഉണ്ടായിരിക്കുന്നത്. ഈ വര്‍ഷം ഉത്രാടം വരെയുള്ള 9 ദിവസം 701 കോടിയുടെ മദ്യമാണ് വിറ്റഴിച്ചത്. കഴിഞ്ഞ വര്‍ഷം ഇതേ ദിവസങ്ങളില്‍ 715 കോടിയുടെ മദ്യം വിറ്റഴിച്ചിരുന്നു. എന്നാല്‍ തിരുവോണം കഴിഞ്ഞുള്ള രണ്ട് ദിവസങ്ങളില്‍ കൂടുതല്‍ മദ്യം വിറ്റഴിച്ചതാണ് മുന്‍വര്‍ഷത്തെ ആകെ വില്‍പ്പനയെ മറികടന്നത്.

ഉത്രാട നാളില്‍ മദ്യ വില്‍പ്പന മുന്‍വര്‍ഷത്തെക്കാള്‍ കൂടിയിരുന്നു. ഇത്തവണ 124 കോടി രൂപയുടെ മദ്യമാണ് വിറ്റത്. കഴിഞ്ഞ വര്‍ഷത്തെ  ഉത്രാട ദിന വില്പന 120 കോടിയായിരുന്നു. തിരുവോണ ദിവസം ബെവ്‌കോ അവധിയായിരുന്നു. നേരത്തെ ഓണത്തിന് ബെവ്കോ ജീവനക്കാരുടെ ബോണസ് സംസ്ഥാനത്ത് വലിയ ചര്‍ച്ചയായിരുന്നു.