കൊച്ചി: ഐഎസ്എല്ലില്‍ ബ്ലാസ്റ്റേഴ്‌സിന് ആദ്യ ജയം. കരുത്തരായ ഈസ്റ്റ് ബംഗാളിനെ ഒന്നിനെതിരെ രണ്ട് ഗോളുകള്‍ക്കാണ് മഞ്ഞപ്പട പരാജയപ്പെടുത്തിയത്. ബ്ലാസ്റ്റേഴ്‌സിനായി നോഹ സദോയിയും (63), ക്വാമെ പെപ്രയുമാണ് (88) ഗോളുകള്‍ നേടിയപ്പോള്‍, ഈസ്റ്റ് ബംഗാളിന്റെ ഏക ഗോള്‍ മലയാളി താരമായ വിഷ്ണു പി വി (59) സ്വന്തമാക്കി. സ്വന്തം കാണികള്‍ക്ക് മുന്നില്‍ തുടര്‍ച്ചയായ രണ്ടാം മത്സരത്തിലും തോല്‍വിയിലേക്ക് എന്ന് തോന്നിപ്പിച്ച ശേഷമാണ് മഞ്ഞപ്പട മിന്നി വിജയം പിടിച്ചെടുത്തത്.

59ാം മിനിറ്റില്‍ മലയാളി താരമായ വിഷ്ണുവിലൂടെ ഈസ്റ്റ് ബംഗാള്‍ മുന്നിലെത്തി എന്നാല്‍, അധികം വൈകാതെ ഐഎസ്എല്ലിലെ തന്റെ ആദ്യ ഗോള്‍ നേടി നോഹ ബ്ലാസ്റ്റേഴ്‌സിനെ ഒപ്പമെത്തിച്ചു. ഈസ്റ്റ് ബംഗാള്‍ പ്രതിരോധ നിരയെ തകര്‍ത്തെറിഞ്ഞ് നോഹ തൊടുത്ത ഇടംകാലന്‍ ഷോട്ട് പ്രബ്‌സുഖന്‍ ഗില്ലിന്റെ കാലുകള്‍ക്കിടയിലൂടെ ഈസ്റ്റ് ബംഗാളിന്റെ വലയിലേക്ക് കയറി.

സമനില കണ്ടെത്തിയതോടെ സബസ്റ്റിറ്റിയൂഷനുകള്‍ വരുത്തി ഉണര്‍ന്നു കളിച്ച ബ്ലാസ്റ്റേഴ്‌സ് രണ്ടാം ഗോളിനുള്ള ശ്രമം തുടങ്ങി. 88ാം മിനിറ്റില്‍ ക്വാമെ പെപ്ര ബ്ലാസ്റ്റേഴ്‌സിന്റെ വിജയഗോള്‍ നേടി. ഈ വിജയത്തോടെ ബ്ലാസ്റ്റേഴ്‌സ് പോയിന്റ് പട്ടികയില്‍ ആറാം സ്ഥാനത്തേക്ക് കയറി. രണ്ട് മത്സരങ്ങളിലും പരാജയപ്പെട്ട ഈസ്റ്റ് ബംഗാള്‍ 12ാം സ്ഥാനത്താണ്.