ബെംഗളൂരു: കര്‍ണാടക മുഖ്യമന്ത്രി സിദ്ധരാമയ്യക്കെതിരെ ഇഡി അന്വേഷണം. മൈസൂരു നഗരവികസന ഭൂമിയിടപാട് കേസില്‍ ലോകായുക്ത അന്വേഷണത്തിന് പിന്നാലെയാണ് ഇഡി കേസ് എടുത്തത്. അദ്ദേഹത്തെ കൂടാതെ ഭാര്യ ബിഎം പാര്‍വതി ഉള്‍പ്പടെ നാലുപേര്‍ക്കെതിരെയാണ് ഇഡി കേസ് എടുത്തിട്ടുള്ളത്.

മുഖ്യമന്ത്രി സിദ്ധരാമയ്യയെ ഒന്നാം പ്രതിയാക്കി ഭൂമിയിടപാടിലെ അഴിമതി ആരോപണത്തില്‍ നേരത്തെ ലോകായുക്ത പൊലിസ് കേസെടുത്തിരുന്നു. വ്യാജരേഖയുണ്ടാക്കി ഭൂമി സ്വന്തമാക്കിയെന്ന സന്നദ്ധപ്രവര്‍ത്തകയുടെ പരാതിയില്‍ ജനപ്രതിനിധികള്‍ക്കുള്ള പ്രത്യേക കോടതിയുടെ നിര്‍ദേശപ്രകാരമായിരുന്നു നടപടി.

ഭാര്യ പാര്‍വതി, ഭാര്യാസഹോദരന്‍ മല്ലികാര്‍ജുന സ്വാമി എന്നിവര്‍ കേസിലെ രണ്ടും മൂന്നും പ്രതികളാണ്. സിദ്ധരാമയ്യക്കെതിരെ അഴിമതി നിരോധന നിയമപ്രകാരം അന്വേഷണം നടത്താമെന്നു കഴിഞ്ഞ ദിവസം ഹൈക്കോടതി വിധിച്ചിരുന്നു. മൈസൂരു നഗര വികസന അതോറിറ്റി (മുഡ) പാര്‍വതിക്ക് 14 സൈറ്റുകള്‍ അനുവദിച്ചതില്‍ 55.8 കോടി രൂപയുടെ ക്രമക്കേടുണ്ടെന്നാണ് ആരോപണം.

Karnataka Chief Minister Siddaramaiah faces ED investigation, sparking controversy in state politics, amid allegations of financial irregularities and misuse of power.