കോഴിക്കോട്/ കൊച്ചി: എംഡിഎംഎ കേസില്‍ എറണാകുളത്തും, കോഴിക്കോടുമായി മൂന്നുപേര്‍ അറസ്റ്റില്‍. സംഭവത്തില്‍ ഷെമിന്‍ പിടി, അനൂപ് പിജെ എന്നിവരാണ് എറണാകുളം പള്ളുരുത്തി പൊലിസിന്റെ പിടിയിലായത്. ഇവരില്‍ നിന്ന് 5.26 ഗ്രാം എംഡിഎംഎ പിടിച്ചെടുത്തു. 

പൊലിസിന് ലഭിച്ച രഹസ്യ വിവരത്തെതുടര്‍ന്നാണ് ഇരുവരും പിടിയിലായത്. പ്രതികള്‍ ഇത് വില്‍പ്പനയ്ക്കായി ശേഖരിച്ച് വെച്ചതാണെന്ന് പൊലിസ് പറഞ്ഞു. പ്രതികളെ കോടതിയില്‍ ഹാജരമാക്കി. 

അതേസമയം കോഴിക്കോട് ബസ് ജീവനക്കാരന്റെ പക്കല്‍ നിന്നാണ് 30 ഗ്രാം എംഡിഎംഎ കണ്ടെത്തിയത്. ഫറോക്ക് കോളജ് റൂട്ടിലോടുന്ന ബസിലെ ജീവനക്കാരന്‍ ബേപ്പൂര്‍ ചെറുക്കുറ്റിവയല്‍ ബിജുവാണ് പിടിയിലായത്. ഇയാള്‍ ബെംഗളൂരുവില്‍ നിന്നും മയക്കുമരുന്ന് കോഴിക്കോട് എത്തിച്ച് വില്‍പ്പന നടത്താറുണ്ടായിരുന്നെന്ന് പൊലിസ് പറഞ്ഞു. 

ഫറോക്ക് മേഖലയിലെ വിദ്യാഭ്യാസ സ്ഥാപനങ്ങള്‍ കേന്ദ്രീകരിച്ച് മയക്കുമരുന്ന് വില്‍പ്പന നടത്തുന്നതില്‍ പ്രധാനിയാണ് ഇയാളെന്ന് പൊലിസ് പറഞ്ഞു. എംഡിഎംഎ വെളുത്ത നിറത്തില്‍ ക്രിസ്റ്റല്‍ രൂപത്തിലായതിനാല്‍ കല്‍ക്കണ്ടം പൊടിച്ചതാണെന്ന് പറഞ്ഞാല്‍ രക്ഷിതാക്കള്‍ക്കും അധ്യാപകര്‍ക്കും മനസിലാകില്ലെന്ന് പറഞ്ഞാണ് ഇയാള്‍ വിദ്യാര്‍ഥികള്‍ക്കിടയില്‍ വില്‍പ്പന നടത്തിയിരുന്നത്. വരുന്ന അവധി ദിവസങ്ങളില്‍ ലഹരിപ്പാര്‍ട്ടി സംഘടിപ്പിക്കുന്നതിനായാണ് ഇയാള്‍ മയക്കുമരുന്ന് കൊണ്ടുവന്നതെന്നാണ് പൊലിസിന് ലഭിച്ച രഹസ്യ വിവരം.

MDMA sales Two people were arrested from Ernakulam and Kozhikode