ആലപ്പുഴ: ആലപ്പുഴയില്‍ നിര്‍മാണത്തിലിരുന്ന ഓടയിലേക്ക് ഗര്‍ഭിണി വീണു. നാലുമാസം ഗര്‍ഭിണിയായ യുവതിയാണ് അപകടത്തില്‍പെട്ടത്. ആലപ്പുഴ നഗരത്തില്‍ ഇന്ദിരാജംഗ്ഷന് സമീപത്താണ് സംഭവം. 

കൃത്യമായി മൂടാതെ ഓടയ്ക്ക് മുകളില്‍ സ്ഥാപിച്ച പലക തകര്‍ന്നാണ് യുവതി വീണത്. കഷ്ടിച്ചാണ് ഇവര്‍ പരുക്കേല്‍ക്കാതെ രക്ഷപ്പെട്ടത്. കുഴിച്ചിട്ട ഭാഗത്ത് അപകട സൂചന നല്‍കുന്ന സൈന്‍ ബോര്‍ഡ് സ്ഥാപിച്ചിട്ടുണ്ടായിരുന്നില്ല. 

കഴിഞ്ഞ ആറാം തീയതി രാത്രി ഏഴരക്കാണ് സംഭവമുണ്ടായത്. ഓട മുറിച്ചുകടന്ന ഭര്‍ത്താവിന് പിന്നിലായാണ് യുവതി നടന്നുവന്നത്. മരപ്പലകയില്‍ ചവിട്ടിയതും അത് തകര്‍ന്ന് യുവതി ഓടയിലേക്ക് വീഴുകയായിരുന്നു. കാലിനു ചെറിയ തോതില്‍ പരുക്കുണ്ടായതല്ലാതെ യുവതിക്ക് മറ്റ് പ്രശ്‌നങ്ങളില്ല. 

ആറ് മാസത്തിലേറെയായി ഈ ഓടയുടെ നിര്‍മാണം ആരംഭിച്ചിട്ടെന്ന് പ്രദേശവാസികള്‍ പറയുന്നു. എന്നാല്‍ ഇപ്പോള്‍ ഓടനിര്‍മ്മാണം ഏതാണ്ട് നിലച്ച മട്ടാണെന്നും ഇവര്‍ ചൂണ്ടിക്കാട്ടുന്നു. ഒട്ടും കട്ടിയില്ലാത്ത പലകയാണ് ഓടയ്ക്ക് മുകളില്‍ സ്ഥാപിച്ചിരുന്നത്.