തൃശൂര്‍: ഉപതെരഞ്ഞെടുപ്പ് നടക്കാനിരിക്കുന്ന ചേലക്കര മണ്ഡലത്തിലെ വള്ളത്തോള്‍ നഗറില്‍ കള്ളപ്പണ വേട്ട. മതിയായ രേഖകള്‍ ഇല്ലാതെ കൊണ്ടുവന്ന 19.7 ലക്ഷം രൂപയാണ് പിടികൂടിയത്. ചെറുതുരുത്തി കലാമണ്ഡലം പരിസരത്ത് നിന്നാണ് പണം പിടിച്ചത്.തെരഞ്ഞെടുപ്പിന് കൊണ്ടുവന്ന പണമാണോ എന്ന് പരിശോധിക്കുന്നു. 

കാറില്‍ പിന്നില്‍ സൂക്ഷിച്ച ബാഗില്‍ നിന്നാണ് പണം പിടിച്ചെടുത്തത്. രേഖകളില്ലാത്തതിനാല്‍ പണം ആദായനികുതി വകുപ്പിന് കൈമാറും. 

സംഭവത്തില്‍ കൊളപ്പുള്ളി സ്വദേശി ജയന്‍ എന്നയാളെ പൊലിസ് കസ്റ്റഡിയിലെടുത്തു. വീട് പണിക്ക് വേണ്ട ടൈല്‍സ് വാങ്ങാനായി എറണാകുളത്തേക്ക് പോകുകയാണെന്നും ടൈല്‍സ് വാങ്ങാന്‍ വേണ്ടിയാണ് പണമെന്നുമാണ് ജയന്‍ നല്‍കിയ മൊഴി. ബാങ്കില്‍ നിന്ന് 25 ലക്ഷം രൂപ പിന്‍വലിച്ചതിന്റെ രേഖയും ജയന്‍ കാണിച്ചു. എന്നാല്‍ 5.3 ലക്ഷം രൂപ ബാഗില്‍ കുറവാണല്ലോയെന്ന ചോദ്യത്തിന് ഉത്തരം നല്‍കാന്‍ ഇയാള്‍ക്ക് സാധിച്ചില്ല.